"Ermənistan özü də bilir ki, konstitusiyasını dəyişmədən..." - AÇIQLAMA

“Əldə olunan nailiyyətlər birbaşa ikitərəfli danışıqların Azərbaycanın ardıcıl olaraq mübarizə apardığı normallaşma prosesində irəliləməyin ən yaxşı və yeganə əlverişli yolu olduğunu əyani şəkildə göstərir”. Bunu Azərbaycanın xarici işlər naziri Ceyhun Bayramov ATƏT Nazirlər Şurasının 31-ci iclasındakı bəyanatında deyib. O bildirib ki, buna baxmayaraq normallaşma istiqamətində həll olunmamış problemlər də qalmaqdadır.

Sözügedən problemlər nədən ibarətdir?

Bununla bağlı Sfera.az-a açıqlama verən siyasi şərhçi Kənan Novruzov deyib ki, münasibətlərin normallaşmasında vasitəçilik iddiası ilə çıxış edən kifayət qədər tərəf var. 

Onun sözlərinə görə, fərqli Avropa dövlətləri, ABŞ və Rusiya, həmçinin Gürcüstan zaman- zaman bu məsələ ilə bağlı öz təkliflərini səsləndirirlər:

“Ancaq həmin oyunçuları düşündürən, sözsüz ki, daha çox öz maraqlarıdır. Odur ki, onlar vasitəçilik məsələsinə də müxtəlif konteksdən yanaşırlar. Azərbaycan vasitəçilik iddiasında olan tərəflərin imkanlarından öz xeyrinə istifadə etməlidir. Amma prosesi tamamilə onların öhdəsinə buraxmaq olmaz. Bu, perspektivdə fərqli aktorların sülh quruculuğu prosesinə xələl gətirməsi ilə nəticələnə bilər.  Ermənistan da bunu başa düşməli və üçüncü tərəflərə bel bağlamamalıdır - münasibətlərin normallaşmasında və sülh sazişi məsələsində səmimidirsə..”.

Müsahibimiz qeyd etdi ki, burada başqa bir məqam Ermənistanın Azərbaycana qarşı davam edən ərazi iddialarıdır:

“Bu, sülh sazişinə mane olan əsas məsələdir. Rəsmi Bakı qarşı tərəfdən haqlı olaraq ərazi iddialarından imtina etməsini və bunu konstitusiya səviyyəsində təsbit etməsini tələb edir. Çünki Ermənistan gələcəkdə konstitusiyaya istinad edərək yenidən revanşa cəhd edə bilər. Azərbaycan məhz bu ssenarinin qarşısını almağa çalışır. Rəsmi İrəvan isə qəribə ritorika ortaya qoyur: Konstitusiya dəyişikliyi barədə bir kəlmə də danışmadan, sülh sazişinin ən yaxın zamanda imzalanmasında maraqlı olduğunu bildirir. Hərçənd bunun mümkünsüz olduğunu özü də bilir. Bu isə Ermənistanın əslində qeyri-səmimi olduğunu və üçüncü güclərin təsiri ilə davrandığını  bir daha nümayiş etdirir.  Ermənistan Konstitusiyasına müvafiq formada dəyişiklik etmədikcə böyük ehtimalla sülh sazişi imzalanmayacaq. Bundan ən çox əziyyət çəkən isə rəsmi İrəvan özü olacaq”.

Günay Rəsulqızı