Milyarderlərin sayı və sərvəti KƏSKİN ARTDI - FANTASTİK RƏQƏMLƏR

İsveçrənin UBS bankı dünya milyarderlərinin sayı və sərvəti ilə bağlı yeni hesabatını açıqlayıb.

Sfera.az xəbər verir ki, bir il əvvəl dünyada 2544 milyarder olduğu halda, bu il onların sayı 2682-yə, sərvətlərinin dəyəri isə 12 trilyon dollardan 14 trilyon dollara yüksəlib. UBS xatırladır ki, 2015-ci ildə milyarderlərin ümumi sərvəti 6,3 trilyon dollar təşkil edirdi.

Ən çox milyarder ABŞ-dədir. ABŞ-də milyarderlərin sayı 751-dən 835-ə yüksəlib. Amerikalı milyarderlərin ümumi sərvəti 4,6 trilyon dollardan 5,8 trilyon dollara qədər artıb. Çində milyarderlərin sayında azalma müşahidə edilir.

2021-ci ildə Çində 626 milyarder olduğu halda, 2023-cü ildə milyarderlərin sayı 520 nəfər, 2024-cü ildə isə 427 nəfərə düşüb. Çində milyarderlərin sayı azalmaqla yanaşı, onların sərvətləri də azalıb. Ötən il 1,8 trilyon dollar olan Çin milyarderlərinin sərvətinin dəyəri 1,4 trilyon dollara düşüb.

İqtisadiyyatı sürətlə böyüyən Hindistanın milyarderlərinin sayı və sərvəti artır. Son bir il ərzində milyarderlərin sayı 20 faiz artaraq 185-ə, sərvətləri isə 40%-dən çox artaraq 906 milyard dollara çatıb.

Qərbi Avropada milyarderlərin sayına görə İsveçrə Britaniyanı qabaqlayaraq Almaniyadan sonra ikinci sıraya yüksəlib. Almaniyada 117 milyarder (8 nəfər artıb), İsveçrədə 85 milyarder (10 nəfər artıb), Britaniyada 82 milyarder, Fransa 46 milyarder (12 nəfər artıb), İtaliyada 62 milyarder (6 nəfər artıb), İspaniyada 27 milyarder (3 nəfər artıb) var.

Vasif

Sfera.az