Müharibələr dünyada silah satışını ARTIRIB - RƏQƏMLƏR

Dünyanın ən yaxşı 100 müdafiə sənayesinə sahib olan ölkələr müharibələrin və regional gərginliyin təsiri ilə silah satışlarını 2023-cü ildə 4,2 faiz artıraraq 632 milyard dollara çatdırıb.

Sfera.az xəbər verir ki, bu haqda məlumatı Stokholm Beynəlxalq Sülh Araşdırmaları İnstitutu (SIPRI) açıqlayıb.

Ən çox silahı ABŞ satıb. SİPRİ-nin məlumatına əsasən, 2023-cü ildə ABŞ silah satışlarını bir əvvəlki ilə görə 2,5 faiz artıraraq 317 milyard dollara çatdırıb.

Avropa ölkələrinin silah istehsal edən 27 şirkəti (Rusiya istisna olmaqla) ümumilikdə 133 milyard dollar dəyərində silah satıblar. Bu, 2022-ci illə müqayisədə 0,2 faiz artım deməkdir.

İlk 100-lükdə yer alan üç İsrailli şirkətin silah gəlirləri 13,6 milyard dollara çatıb. Ümumilikdə, SIPRI 2023-cü ildə qlobal hərbi xərclərin 7 faiz artacağını bildirib. Bu, 2009-cu ildən bəri ən böyük illik artımdır.

Rusiya da silah satışını artırıb. Rusiya dövlətinə məxsus olan “Rostex” şirkəti satışlarını 40 faiz artıraraq 26 milyard dollara çatdırıb.

Siyahıya Türkiyədən 3 şirkət daxil olub. 2022-ci ildə siyahıda 62-ci olan “Aselsan” 54-cü, 79-cu yerdə olan “Baykar” 69-cu, 88-ci olan TUSAŞ isə 78-ci yerə yüksəlib. Türkiyənin üç şirkəti silah satışlarını 24 faiz artıraraq 6 milyard dollara çatdırıb.

Vasif

Sfera.az