İndoneziya COP29-da ölkə prezidentinin xüsusi nümayəndəsi ilə təmsil olunacaq
İndoneziya Prezidentinin energetika və ətraf mühit üzrə xüsusi nümayəndəsi Haşim Cocohadikusumo Bakıda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) İndoneziya nümayəndə heyətinə rəhbərlik edəcək.
Sfera.az xəbər verir ki, bu barədə prezidentinin xüsusi nümayəndəsi “CNN Indonesia” telekanalına məlumat verib.
“Mən Prezident Prabovo Subianto tərəfindən COP29 üzrə xüsusi nümayəndə təyin edildim”, - o bildirib.
O, İndoneziyanın bu konfransa hazırlıq səviyyəsindən də məmnunluğunu ifadə edib: “Mən İndoneziya hökumətinin qarşıya qoyduğu məqsədlərə çatacağına nikbinəm”.
İndoneziya ətraf mühit naziri Hanif Faysol Nurofik bildirib ki, COP29-da İndoneziya Milli Səviyyədə Müəyyən Edilmiş Töhfədə (NDC) müəyyən edilmiş iqlim dəyişikliyi ilə mübarizə hədəflərinə nail olmaqda irəliləyiş barədə məlumat verəcək. Bu sənəd çərçivəsində İndoneziya 2030-cu ilə qədər istixana qazı emissiyalarını 31,89 % azaltmağı hədəfləyib ki, bunun böyük hissəsi öz səyləri, 43,2 %-i isə beynəlxalq birliyin dəstəyi ilə əldə ediləcək.
Bundan əlavə, o qeyd edib ki, COP29-da İndoneziya istixana qazı emissiyalarının azaldılmasını sürətləndirmək üçün tədbirləri nəzərdən keçirəcək, həmçinin konfransda iştirak edən bir sıra ölkələrlə karbon kvotaları ticarəti sahəsində əməkdaşlığı müzakirə edəcək.
