"Qarabağda torpaqlar yerli sakinlərə icarəyə verilmir" - Aqil Abbas
"Xocalıda torpaqların icarəyə verildiyi şəxslər arasında qarabağlı yoxdur".
Sfera.az xəbər verir ki, bunu deputat Aqil Abbasov Milli Məclisin 29 oktyabr tarixli plenar iclasında “Torpaq icarəsi haqqında” qanuna dəyişiklik olunması ilə bağlı müzakirədə çıxışı zamanı deyib.
“Xocalıya köçən ailələrə 1 metr torpaq da icarəyə verilmir. Torpaqlar kənardan gələnlərə icarəyə verilir. Qarabağda icarəyə verilən torpaqlarda 1 dənə də qarabağlı iştirak etmir. Qarabağa köçənlərə heyvan saxlamağa 1 metr də torpaq verilmir. Torpaqlar kiminsə monopoliyası üçün işğaldan azad edilməyib. İlham Əliyev Həzrəti Əlinin qılıncı ilə torpaqları işğaldan azad etdi. Köçənlərə bu torpağı verin də.Camaat deyir ki, Füzulinin icra başçısı torpaqları satır, halbuki icra başçısını heç o torpağa buraxmırlar, necə satır? Böyük quruculuq işləri gedir, amma torpaqlar yerli sakinlərə icarəyə verilmir. Təəssüf edirəm”, - millət vəkili vurğulayıb.
Firuzə Əliyeva
