"Onlar haqlı olaraq dünyaya uşaq gətirməkdən imtina edirlər..." - Sosioloq

Rəsmi məlumata görə, Azərbaycanda doğulan körpələrin sayı azalıb. Belə ki, bu ilin yanvar-avqust aylarında Ədliyyə Nazirliyinin rayon (şəhər) qeydiyyat şöbələri ölkədə 68 129 doğulan körpə qeydə alıb. Ötən il isə doğulanların sayı 112 620 olub. Beləliklə, ötən ilin müvafiq dövrü ilə müqayisədə əhalinin hər 1000 nəfərinə düşən doğulan sayı azalaraq 11,1-dən 10-a düşüb. 

Maraqlıdır, niyə doğulan körpələrin sayında bu qədər azalma var? Problem hansısa tibbi səbəbdən qadınların dünyaya uşaq gətirə bilməməsidir, yoxsa şəxsi seçim?

Mövzu ilə bağlı Sfera.az-a açıqlama verən sosioloq Lalə Mehralı bildirib ki, uşaqların azalmasına əsas səbəb evlənənlərin sayının azalması və boşanmaların artmasıdır:

“Bu ilin ilk 7 ayında ölkədə 22 min nikah bağlanıb, 10 min boşanma qeydə alınıb. Bu o deməkdir ki, hər 2 nikahdan biri uğursuz olur. Ümumiyyətlə, azömürlü olan nikahlar pozulur. Ailəsində problem olduğunu düşünənlər dünyaya uşaq gətirməkdən imtina edir. Əslində, haqlı düşüncədir, çünki boşanma halı baş verərsə, uşaqlarla bağlı böyük problemlər yaşanır”.

Sosioloqun sözlərinə görə, nikahı uğurlu olan ailələrdə də uşaq sayında azalma var:

“10-12 illik evli olanlar var ki, bir övlad sahibidir. Həm sosial problemlər, həm müasir dünyada “daha az uşaq, daha az problem” kimi assosiasiya olunan fikirlər ailələrin çoxuşaqlı olmasına imkan vermir. Ailə düşünür ki, 2-3 uşağı yarımçıq böyütdüyümə bir övladı tam təşəkküllü böyüdə bilərəm. Əgər ailələrə dövlət tərəfindən uşaqpulu kimi maddi dəstək verilsə, onlar artımın marağında olar. Təəssüf ki, bu məsələlərdə irəliləyiş əldə etmədiyimizə görə belə vəziyyətlər də qaçılmaz olur”. 

Firuzə Əliyeva