"İranın Cənubi Qafqazdakı mövqelərində sarsıntılar müşahidə olunacaq" - ŞƏRH
“İranın Yaxın Şərqdə üzləşdiyi çətinliklərdən dolayı onun Cənubi Qafqazdakı mövqelərində sarsıntıların müşahidə oluna biləcəyi ehtimalları çoxdur”.
Bunu Sfera.az-a açıqlamasında siyasi təhlilçi Aqşin Kərimov deyib.
Onun sözlərinə görə, bu səbəbdən İran Cənubi Qafqazda şok yaşamamış Azərbaycanla əlaqələri isti saxlamağa çalışır:
“Məlumdur ki, Azərbaycanın maraqları regional və qlobal şərtlərin içərisində irəliləyir. Tehran isə davamlı şəkildə sərt ritorikadan istifadə etsə, Bakı güclü əl kimi İrana qarşı çəkindirmə siyasətini sərtləşdirə bilər. Bu, konseptual şəkildə 2 şərtlə əlaqəlidir. Birincisi, Azərbaycanın stateji müttəfiqi Türkiyə ilə yanaşı, Rusiya, İsraillə əla münasibətləri İranın sponsorluğu ilə həyata keçirilən kəşfiyyat əməliyyatlarını zəiflədir. İkincisi, Azərbaycanın ABŞ başda olmaqla, NATO ilə təhlükəsizlik sahəsindəki əməkdaşlıqlarının dərinliyi İranın regionda Bakıya qarşı qazanc əldə etmək potensiallarını məhdudlaşdırır. Bununla belə, İran Qərblə nüvə danışıqları fonunda Cənubi Qafqaz siyasətində güzəştlər əldə etməyə səy göstərə bilər. Rəsmi Tehran əslində nüvə danışıqlarının canlanmasını sonrakı addımlarını asanlaşdırmaq üçün istifadəyə çalışır. Lakin paralel olaraq proksi ordularını Yaxın Şərqdə qurban verən addımlara da gedə bilər”.
A.Kərimov qeyd edib ki, İran xarici siyasətindəki radikallıqları yüksəldən müqavimət oxunun tamamilə məğlub olmasında maraqlı deyil:
“Əksinə qurbanlar naminə olsa belə, onların yenidən təşkilatlanmasına səy göstərəcək. Bunun siqnallarını isə ələ fürsət düşən kimi, yenidən əvvəlkindən də qat-qat yüksək səviyyədə Cənubi Qafqazda səsləndirməyə başlayacaq. Ümumilikdə proseslərin məcrası İranı Cənubi Qafqazda daha çox güzəşt siyasəti həyata keçirməyə məcbur və təşviq edir. Çünki İranın mövcudluğu və təsiri indiki zamanda özünün ən böyük ekzistensial problemləri ilə üz-üzədir. Bunu da ancaq kompromis siyasəti ilə kompensasiya etmək çarə kimi görünür”.
Günay Rəsulqızı
