Rusiya üç il ərzində orduya 225 min müqaviləli əsgər cəlb etməyi planlaşdırır.

Sfera.az bildirir ki, Rusiya hakimiyyətinin orduya mümkün qədər çox müqaviləli hərbçi cəlb etmək istəyi Rusiyanın Ukraynada ciddi itkilər verməsi ilə izah olunur.

Belə ki, 2023-cü ilin yayında səlahiyyətlilər müqaviləli işçilərin işə qəbulunu sürətləndirmək üçün birdəfəlik ödənişləri əhəmiyyətli dərəcədə artırdılar. Putin federal ödənişi 400 min rubla (7000 manatdan çox) qaldırdıqdan sonra Rusiyanın 47 regionu da regional ödənişləri artırıb. Orta hesabla onların ölçüsü indi 596 min rubl (təxminən 10600 manat) təşkil edir ki, bu da 2022-ci ilin sonundan 3,6 dəfə çoxdur. Moskva, Sankt-Peterburq, Sverdlovsk vilayəti və Qaraçay-Çərkəz kimi bölgələrdə yeni müqavilə ilə əsgərlərə verilən ödənişlərin ümumi məbləği 2 milyon rublu (355 min manatdan çox) ötür. Pul təşviqinin məbləği dəyişməz qalarsa, ayrılan 90 milyard rubl (1 milyard 600 milyon manatdan çox) üç il ərzində 225 min yeni müqaviləli işçi cəlb etməyə imkan verəcək. 

Eyni zamanda, planlaşdırılan xərclərin artması mümkündür. Belə ki, rəsmi məlumatlara görə, təkcə 2024-cü ilin birinci yarısında yeni müqaviləli əsgərlərin ödənişlərinə 32 milyard rubldan (təminən 568 milyon manat) çox vəsait xərclənib ki, bu da gələn il üçün ayrılan büdcəni üstələyir.

Britaniya kəşfiyyatının məlumatına görə, 2024-cü ilin sentyabrına qədər Rusiya ordusunun Ukraynadakı itkiləri 610 min nəfərə çatıb ki, bu da İkinci Dünya Müharibəsindən bəri bütün Rusiya müharibələrindəki itkilərdən çoxdur. Bu rəqəmlər Vladivostok, İrkutsk və ya Xabarovsk kimi böyük şəhərlərin əhalisi ilə müqayisə edilə bilər. Bunlardan 200 mini ölüb ki, bu da Yujno-Saxalinsk və ya Pskov şəhərlərinin əhalisi ilə müqayisə edilə bilər.    

Britaniya kəşfiyyatı qeyd edir ki, Rusiya Silahlı Qüvvələrinin irimiqyaslı itkiləri əsasən komandanlığın piyadaları “insan dalğaları” ilə hücumlara göndərməsi taktikası ilə izah olunur. “Bloomberg” avqust ayında Kremldəki mənbələrə istinadən yazıb ki, Rusiya ordusuna döyüş itkilərini bərpa etmək üçün ayda təxminən 30 min adam lazımdır. Eyni zamanda, bölgələrdə müəyyən edilmiş işə qəbul planının təxminən üçdə biri çatışmır ki, bu da ordunun sayının azalmasına səbəb olur. İki agentlik mənbəyinin bildirdiyinə görə, nəticədə hakimiyyət ilin sonuna qədər yeni səfərbərlik dalğasını nəzərdən keçirə bilər.

Firuzə Əliyeva