Azərbaycanda əsgərlik yaşı artırıla bilərmi? - AÇIQLAMA
Hər ölkədə hərbi xidmətə çağırış qaydaları, çağırış yaşı və xidmətin müddəti müxtəlifdir. Azərbaycanda gənclərin hərbi xidmətə çağırış yaşı 18, əsgərlik müddəti ali təhsilli oğlanlar üçün 12 ay, ali təhsili olmayanlar üçün 18 ay müəyyən edilib. Həmçinin müddətdən artıq hərbi xidmət də mövcuddur ki, bunun da öz qaydaları var. Məsələn, qardaş Türkiyədə hərbi xidmətə çağırış yaşı 21-dir.
Bəs ölkəmizdə çağırış yaşının 19 və ya 20-yə qaldırılması mümkündürmü? Bununla bağlı təkliflər varmı?
Sfera.az xəbər verir ki, mövzu ilə bağlı yenisabah.az-a danışan hərbi ekspert Ədalət Verdiyevin sözlərinə görə, hazırda bu mövzu ətrafında hər hansı müzakirə yoxdur:
"Azərbaycanın çağırışla əlaqədar müvafiq qurumları tərəfindən müddətli hərbi xidmətə çağırış yaşının artırılması müzakirə olunmur. Bu yaş həddinin dəyişdirilməsi ilə bağlı heç bir ciddi müzakirələr getmir. Yaxın perspektivdə də bu mövzuda müzakirələrin olacağını gözləmirəm. Məncə, buna hələlik ehtiyac da yoxdur. Hərbi xidmətə 18 yaşında çağırılan bir əsgər 19-20 yaşında ya evinə qayıda bilir, ya da orduda müvafiq vəzifələrdə qalıb xidmətini MAXE kimi davam etdirə bilir".
Ekspertin fikrincə, müddətli həqiqi hərbi xidmətlə bağlı yaş həddində ediləcək dəyişiklik bir sıra texniki problemlər yarada bilər:
"Digər tərəfdən, xidmət yaşının artırılmasının yarada biləcəyi texniki problemlər də var. Yəni yaş həddi artırılırsa, məsələn, 19 yaş olarsa, ən az 4 çağırış hərbi xidmətə əsgər çağırılmayacaq. Bəs bu məsələni necə həll edəcəyik? Ona görə də bu təkliflər hələki aktual deyil və müzakirəsi aparılmır. Ümumiyyətlə, hələlik aparılması da məqsədəuyğun deyil".
