"Azərbaycanlıların Qərbi Azərbaycana qayıdışı utopik deyil" - ŞƏRH
“Bu gün rəsmi Bakının xarici siyasət kursunun əsas istiqamətlərindən biri məhz Qərbi Azərbaycana qayıdışın təmin olunmasıdır”.
Bunu Sfera.az-a açıqlamasında siyasi şərhçi Kənan Novruzov deyib.
O qeyd edib ki, bu, həm beynəlxalq hüquq, həm də tarixi varislik baxımından azərbaycanlıların haqqıdır:
“Ermənistan bu prosesin ləngiməsi və mümkün olarsa, heç baş tutmaması üçün bütün imkanlardan istifadə etməyə çalışır. Qərbin, o cümlədən Fransanın ritorikası isə Ermənistana əlavə ürək-dirək verir və destruktiv mövqeyini gücləndirir. Ermənistanın azərbaycanlıların Qərbi Azərbaycana qayıdışına mane olmaq üçün ortaya atdığı əsas məsələ ermənilərin Qarabağa qayıdışı ilə bağlıdır. Rəsmi İrəvan bəzi beynəlxalq institutların da təsiri ilə azərbaycanlıların Qərbi Azərbaycana qayıdışını ermənilərin Qarabağa qayıdışı ilə eyniləşdirmək istəyir. Halbuki, bunlar tamam fərqli məsələlərdir: Göyçə, İrəvan, Zəngəzur tarixi Azərbaycan torpaqlarıdır. Ermənilər isə Qarabağa sonradan köçürülüblər. Deməli, bunlar qətiyyən eyniləşdirilməməli məsələlərdir”.
Kənan Novruzov bildirdi ki, perspektivdə azərbaycanlıların Qərbi Azərbaycana qayıdışı məsələsi də heç də utopik deyil:
“Əksinə, buna şübhə olmamalıdır. Perspektivdə Zəngəzur dəhlizinin diplomatik yolla açılması mümkündür. Şübhəsiz ki, bu qərbi azərbaycanlıların öz yurd- yuvalarına qayıdışına töhfə verəcək və prosesi sürətləndirəcək. Bütün hallarda qərbi azərbaycanlıların öz vətənlərinə qayıdışı tarixi ədalət baxımından zərurətdir”.
Günay Rəsulqızı
