Səudiyyə Ərəbistanından 100-ə yaxın iş adamı Azərbaycana səfər edəcək
Gələn ay Səudiyyə Ərəbistanından 100-ə yaxın iş adamının Azərbaycana səfər edəcəyi gözlənilir.
Sfera.az bu barədə Sahibkarlar (İşəgötürənlər) Təşkilatları Milli Konfederasiyasına (ASK) istinadən xəbər verir.
Məlumata görə, qurumun nümayəndə heyəti ilə Səudiyyə Ərəbistanının Azərbaycandakı səfiri Essam Saleh Hamad Algetale arasında keçən görüşdə iki ölkənin iqtisadi əməkdaşlıq imkanları müzakirə olunub.
Səfir Azərbaycanla münasibətləri yüksək qiymətləndirib, ticarətə mənfi təsir edən əsas amilin iş adamlarının birbaşa əlaqə qura bilməməsi, eləcə də logistika ilə bağlı olduğunu vurğulayıb. O, bunun üçün bir neçə alternativ nəqliyyat dəhlizlərinin seçilməsinin zəruriliyini qeyd edərək, daşınmanın Xəzərin şimalından Volqa vasitəsilə, həmçinin Gürcüstan dəmir yolu vasitəsilə və İrandan dəhlizin açılması yolu ilə həyata keçirilməsini təklif edib.
Diplomat həmçinin, Səudiyyə Ərəbistanının Kənd Təsərrüfatı və Heyvandarlıq İnvestisiya şirkəti (SALIC) barəsində məlumat verərək kənd təsərrüfatı sahəsində Azərbaycanın iş adamları ilə birgə əməkdaşlığın hər iki ölkənin iqtisadiyyatına mühüm töhfələr verəcəyini söyləyib. Səfir oktyabrda iş adamlarının Azərbaycana səfər edəcəyini, bu məsələdə Konfederasiyanın iştirakının və dəstəyinin önəmli olduğunu bildirib.
ASK prezidenti Məmməd Musayev öz növbəsində, Səudiyyə Ərəbistanı və Azərbaycan arasında siyasi əlaqələrin son zamanlarda çox yüksək səviyyədə inkişaf etdiyini vurğulayıb. O, İslam Ticarət Palatasının Direktorlar Şurasının üzvü olduğunu və ASK nümayəndə heyətinin bu ilin yanvar ayında Məkkə Halal Forumunda yüksək səviyyədə iştirak etdiyini qeyd edib.
M.Musayev 8-9 oktyabr tarixlərində Azərbaycanda keçiriləcək Azərbaycan Halal Turizm Forumu haqqında səfirə ətraflı məlumat verib. Azərbaycan iş adamlarının məhsullarını Səudiyyə Ərəbistana ixrac etməkdə maraqlı olduqlarını söyləyən Konfederasiya rəhbəri iş adamları arasında B2B görüşlərin təşkil esilməsində ASK-nın lazımi bütün dəstəyi göstəriləcəyini bildirib.
