1,4 milyon dollarlıq idman avtomobili qəzaya səbəb oldu: 12 nəfər xəsarət aldı
Turində idman və lüks avtomobil sərgisi zamanı ağır qəza baş verib. Nadir “Lancia 037” markalı avtomobilin sürücüsünün törətdiyi qəzada 12 tamaşaçı xəsarət alıb.
Sfera.az bildirir ki, nadir və bahalı “Lancia 037” ralli avtomobili izdihamın üzərinə çırpılıb.
Altı zərərçəkən müxtəlif dərəcəli bədən xəsarətləri ilə xəstəxanaya çatdırılıb.
Hadisə avtosalon iştirakçılarının paradı zamanı baş verib. 1982-ci il istehsalı olan “Lancia 037” ralli avtomobilinin sürücüsü sürüşərək təkərləri yandıraraq qəfil yola çıxmaq qərarına gəlsə də, idarəetməni itirib.
“Lancia” markalı idman avtomobili maneəni aşaraq tamaşaçı kütləsinin üzərinə düşüb. 12 nəfər təcili tibbi yardıma müraciət edib: onlardan 6-sı xəstəxanaya çatdırılıb, qalanlarına qəza yerində tibbi yardım göstərilib. Bir qadının vəziyyəti ağırdır. Ona ayağının sınığı diaqnozu qoyulub və təcili əməliyyat olunub.
Qeyd edək ki, indiyə qədər sadəcə 20 ədəd “Lancia 037” ralli avtomobili istehsal edilib. Onların hazırkı hərrac qiyməti 1,4 milyon dollara çatır. 1983-cü ildə idman avtomobili məşhur “Audi Quattro”nu məğlub edərək WRC Dünya Ralli Çempionatının qalibi olub.
Orta mühərrikli, arxa ötürücülü “Lancia 037” kupesi kompozit materiallardan hazırlanmış kuzova malikdir, cəmi 960 kq ağırlığındadır. Model 255-dən 325 at gücünə qədər 2,0 litrlik turbo mühərriklərlə təchiz edilib.
Aysel
Sfera.az
