Fransalı nazirin Ermənistana dəstəyi: Paris İrəvanı Rusiyanın əlindən ala biləcəkmi?

Xəbər verdiyimiz kimi, Fransa xarici işlər naziri Stefan Sejurne Ermənistana səfər edib. O, ölkəsinin Ermənistanı rəsmi Moskvanın təzyiqlərindən qoruyacağını bildirib, hətta Rusiyanı Ermənistanın düşməni elan edib.

“Rusiyanın təhdidlərinə və aşkar düşmənçiliyinə baxmayaraq, erməni xalqına və hökumətinə dəstək veriləcək. Demokratik dəyərlərin qorunmasında hər zaman bizim köməyimizə arxalana bilərsiniz”, - fransalı nazir qeyd edib.

Fransalı nazirin bu açıqlaması hansı nəticələrə gətirib çıxara bilər?

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Fransa Ermənistan və Rusiya arasında siyasi böhranın dərinləşməsində maraqlıdır. Onun sözlərinə görə, bu kontekstdə fransalı nazirin verdiyi açıqlama Kremlin İrəvana təzyiq etməsi üçün hesablanıb: 

“Fransa Ermənistanda siyasi-hərbi əlaqələrini inkişaf etdirir. Bu ölkənin Ermənistanda möhkəmlənməsi isə Cənubi Qafqaz üçün yeni təhlükəsizlik riski yaradır. Demək olar ki, Ermənistan Rusiya və Fransa arasında qarşıdırma plasdarmına çevrilir. Beləliklə, Ermənistan Cənubi Qafqazda forpost olacaq. Lakin Nikol Paşinyan ötən gün açıqlamasında ölkəsinin digər bir ölkənin forpostu olmasına qarşı olduğunu qeyd etmişdi. Görünür, bu kimi açıqlamalar məhz Moskvaya ünvanlanmışdı. Fikrimcə, Paşinyan xələflərinin siyasətini aparır. Əvvəlki hökumətlər Moskvanın forpostu olmuşdu, Paşinyan isə sadəcə olaraq Moskvanı Parisə dəyişir”.

Politoloq qeyd etdi ki, Ermənistanda kölə siyasəti hələ də davam edir:

“Düşünürəm ki, Fransa Rusiya qarşısında Ermənistana ciddi siyasi və hərbi təhlükəsizlik dəstəyi göstərə bilməyəcək. Onun bu cür imkanları zəifdir.  Rusiya isə Ermənistana sanksiyalar tətbiq edərsə, ölkə iqtisadiyyatı iflic olacaq, nəticədə xalq bu vəziyyətə etiraz edəcək. Digər tərəfdən, Fransanın uzun müddət Ermənistana maliyyə və iqtisadi dəstək verməsi də mümkün görünmür. Rəsmi İrəvan yalnız Azərbaycan və Türkiyə ilə normallaşma prosesinə gedərsə, öz həqiqi müstəqilliyini əldə edəcək”.

Günay Rəsulqızı