"F1" Azərbaycan Qran Prisi üzrə Uniforma və Akkreditasiya Mərkəzi fəaliyyətə BAŞLADI
Formula 1 Qatar Airways Azərbaycan Qran-Prisi 2024-ün başlamasına qısa müddət qalıb və hazırlıqlar plana uyğun davam edir. Yarışın əsas hazırlıq mərhələlərindən biri olan Uniforma və Akkreditasiya Mərkəzi artıq fəaliyyətə başlayıb.
Bu barədə Sfera.az-a Bakı Şəhər Halqası Əməliyyat Şirkətindən məlumat verilib.
Bildirilib ki, Formula 1 Qatar Airways Azərbaycan Qran Prisi 2024-ün təşkilinə cəlb olunacaq əməkdaşlar, könüllülər, marşallar, təhlükəsizlik əməkdaşları və podratçı şirkətlərin nümayəndələri bu mərkəzə gələrək, akkreditasiya kartları və uniformalarını əldə edə bilərlər. Yarışa qədər 28000-ə yaxın akkreditasiya və formanın verilməsi nəzərdə tutulub.
Qeyd edək ki, 19 avqustdan etibarən fəaliyyət göstərən Uniforma və Akkreditasiya Mərkəzinə 100-dən artıq könüllü cəlb edilib. Mərkəz fəaliyyət göstərdiyi müddətdə onlar qeydiyyat, akkreditasiya kartlarının hazırlanması, uniformaların verilməsi və sair kimi rolları yerinə yetirəcəklər.
Xatırladaq ki, bu il könüllü olmaq üçün 16000-ə yaxın müraciət daxil olub və onlardan 2000-ə yaxın könüllü yarışın təşkilinə cəlb olunub.
Xatırladaq ki, bu il Bakının 8-ci dəfə ev sahibliyi etdiyi Formula 1 Qatar Airways Azərbaycan Qran Prisi 2024 13-15 sentyabrda baş tutacaq.
Firuzə Əliyeva
