Avropalılar hibrid avtomobillərə üstünlük verir - SƏBƏB

Avropada son bir ildə elektrik və plugin hibrid (elektrik yükləmə imkanı olan - red.) avtomobillərə tələb azalıb, sadə hibrid avtomobillərə tələb isə kəskin artıb. 

Sfera.az Avropa Avtomobil İstehsalçıları Birliyinin məlumatlarına istinadən xəbər verir ki, Avropa Birliyində yeni avtomobil satışları iyulda keçən ilin eyni ayına nisbətən 0,2 faiz artıb. 

Müqayisə edilən dövrdə elektrik avtomobillərin satışı 10,8 faiz, plugin hibrid avtomobil satışları 14,1 faiz azalıb. Hibrid avtomobillərin satışları isə 25,7 faiz artıb. 

Avropalı ekspertlərin fikrincə, hibrid avtomobillərlə müqayisədə digərlərinin satışının azalması həmin avtomobillərin praktikada özünü sadə hibrid avtomobillərlə müqayisədə doğrultmaması ilə bağlıdır. Sadə hibridlərdən fərqli olaraq elektrik və plugin hibrid avtomobillərə kənardan elektrik yüklənməlidir. Buna görə də hər dəfə yanacaqdoldurma məntəqələrindən və ya fərdi vasitələrdən istifadə edilməlidir. Elektriklə yükləmə çox vaxt apardığından avtomobil sahibləri üçün əlverişli olmur. Sadə hibridlərdə isə elektriklə yükləmə dinamodan gələn cərəyanla təmin edildiyindən xüsusi xidmətə ehtiyac olmur.  

Bu səbəbdən sadə hibridlərə tələb sürətlə artır. 

Vasif