"Füzulinin nəşini gətirmək lazım deyil, guya, qədrini biləcəklər?" - İlahiyyatçıdan ETİRAZ
“Məhəmməd Füzulinin qəbrini ölkəmizə gətirmək lazım deyil, bunun qəti əleyhinəyəm”.
Sfera.az bildirir ki, bunu ilahiyyatçı Tural İrfan deyib. O qeyd edib, bu, həm də dinimizin qaydalarına ziddir:
“Əksinə, xalqımıza məxsus olun dahilər dünyanın hər yerinə həm ölü, həm də diri olaraq səpələnsə, yaxşıdır. Hamısını bura yığmaqla, guya, qədrini bilənlər artacaq, yoxsa nə baş verəcək? Şamaxıda Şirvanşahlar dövlətinin 36-cı hökmdarı Fərrux Yasarın məzarı baxımsız vəziyyətdədir, bəlkə də yaxın illərdə tam itəcək. Elə xalqlar var ki, bizim bircə xanımız sanbalda tarixi şəxsiyyəti yoxdur, onunkunu-bununkunu öz adına çıxır. Biz də şahların qəbrini itirməklə məşğuluq”.
T.İrfan bildirib ki, yüzlərlə belə dahilərimizin məzarı unudulub:
“Heç olmasa, Füzuli elə bir müqəddəs yerdə dəfn olunub ki, onu ora gedən bütün millətlər yad edir, tanıyır. Bura gətirib sabah yiyə durmamaqdansa, qoy yerində qalsın. Biri Rəsulzadənin məzarını gətirək deyir, biri Nəsimini gətirək deyir... Qəbirşünas yox, qədirşünas olmaq lazımdır. O simaların amalını, yolunu, irsini qorusunlar, yaşatsınlar, bu bəsdir”.
Türkan
