“Telegram” sosial şəbəkəsinin yaradıcısı Pavel Durovun Fransanın hava limanında həbs olunması dünya mediasının əsas gündəm mövzularından birinə çevrilib. Qeyd olunub ki, Durovun Fransada nəzarətdə saxlanılma müddəti 48 saat uzadılıb. 

Bununla bağlı Sfera.az-a açıqlama verən politoloq Elxan Şahinoğlu xatırladıb ki, Pavel Durov Rusiyada biznes fəaliyyətinin imkansız olduğunu əsas gətirərək 3 il əvvəl ölkə vətəndaşlığından imtina edib:

“Ancaq orası da var ki, Ukraynaya qarşı işğalçı müharibə aparan Rusiyanın dövlət strukturlarındakı şəxslər yazışmalarının əksəriyyətini “Telegram” üzərindən həyata keçirirlər. Ona görə də həmin strukturlar indi qorxurlar ki, Durov sosial şəbəkənin kodlarını Fransanın kəşfiyyat struktularına təhvil verə bilər. Bu isə öz növbəsində Rusiyanın siyasi və hərbi strukturlarının nümayəndələrinin “Telegram” üzərindən yazışmalarının faş olmasına şərait yaradacaq”.

Politoloq qeyd edib ki, burada müəmmalı bir məsələ var:

“Maraqlıdır ki, Durov Fransada həbs olunacağını bilə-bilə şəxsi təyyarəsi ilə Bakıdan Parisə uçmağa qərar verib. Fransanın müvafiq strukturları Durovun Bakı səfərinin təfərrüatlarını da ondan öyrənməyə çalışacaqlar. Rusiyanın mühacirətdə olan müxalifət nümayəndələri və yazarları ikiyə bölünüblər. Bir qisim Durovun həbsinin siyasi motivli olduğuna iddia edərək onun azadlığını tələb edir, digərləri isə “Telegram” yaradıcısının Rusiyanı tərk etməsinə baxmayaraq, onun şəbəkəsinin işğalçı qüvvələrin dəstəkçisi rolunda çıxış etdiyini vurğulayırlar”.

Günay