Rusiya İrəvanla sülh danışıqlarında vasitəçi olacaq? - AÇIQLAMA
Rusiya Prezidenti Vladimir Putinin Bakıya səfəri avqustun 19-da başa çatıb. Azərbaycan Prezidenti İlham Əliyevlə məhdud tərkibdə keçirilən görüşdə isə bir sıra məsələlər müzakirə edilib. Bunlardan biri də Azərbaycan-Ermənistan danışıqları ilə bağlı idi.
Maraqlıdır, Rusiya İrəvanla sülh danışıqlarında vasitəçi ola bilərmi?
Bununla bağlı Sfera.az-a açıqlama verən siyasi şərhçi Asif Nərimanlı deyib ki, Azərbaycan Prezidenti bəyanatında bu məsələyə toxunmadı, çünki rəsmi Bakı İrəvanla danışıqlarda ikitərəfli formata üstünlük verir.
O xatırladıb ki, Rusiya isə Bakı-İrəvan xəttindəki bütün danışıqlara – sülh sazişinin imzalanmasına, uzunmüddətli proses olan delimitasiya prosesinə, kommunikasiyanın açılmasına və digər humanitar məsələlərə qoşulmaq istəyir:
“Putin də bəyanatında bunu dilə gətirdi. Bunun Moskvanın regional maraqlarından qaynaqlandığı bəllidir. Lakin Rusiya da daxil olmaqla, istənilən üçüncü tərəfin müdaxiləsi bölgədə maraqlı olan bütün oyunçuların prosesə qoşulmasına, nəticədə sülh danışıqlarının geosiyasi mübarizəyə çevrilməsinə səbəb olur. Son 4 ilin təcrübəsi bunu təsdiq edib. Bu isə Bakının maraqlarına uyğun deyil. Dövlət başçısı İlham Əliyevin məsələyə toxunmaması və üzərindən səssiz keçməsi də bununla bağlı idi”.
A.Nərimanlı qeyd edib ki, mövcud vəziyyətdə Bakı və İrəvanın vasitəçiyə ehtiyacı yoxdur:
“Əksinə, bu gün Azərbaycanın özü Rusiya və Ukrayna arasında vasitəçilik edə, danışıqlar üçün platforma rolunu üzərinə götürə bilər. Bunun üçün lazım olan hər şeyə - hər iki tərəflə münasibətlərə, tərəflər arasında körpü olmaq potensialına və qlobal danışıqlara ev sahibliyi etmək təcrübəsinə malikdir”.
Günay
