Məşhur iş adamı gəmi qəzasında itkin düşdü

Siciliya sahillərində “Bayesian” yaxtası güclü fırtınaya tutularaq batıb. Hazırda dalğıclar 50 metr dərinlikdə işləyir, ölənlərin cəsədlərini tapmağa çalışırlar.


Sfera.az bildirir ki, yaxtanın batması nəticəsində itkin düşən 6 nəfər arasında Britaniyalı texnologiya maqnatı Mayk Linç də var.

Xilas edilən 15 nəfər arasında Linçin həyat yoldaşı da olub. Dalğıclar 50 metr dərinlikdə gəminin qalıqlarını araşdırır. İndiyə qədər yalnız gəmi aşpazının cəsədi tapılıb. Britaniyalı milyoner Mayk Linç də daxil olmaqla daha altı sərnişin hələ də itkindir.
 

Dəbdəbəli yelkənli yaxta Palermo yaxınlığındakı Porticello sahillərində yanalmışdı, səhər saat 5 radələrində şiddətli fırtına gəmini yanalma yerindən qoparıb batırıb.


Linçin həyat yoldaşı Angela Bacares, on ekipaj üzvü, sahibi və 11 qonağı daşıyan 55 metrlik yaxtadan xilas edilən on beş nəfər arasında olub.
 

Yaxınlıqdakı yelkənli qayıq tərəfindən xilas edilənlər arasında bir yaşlı qız və onun valideynləri də olub. Lakin aralarında Britaniya, ABŞ və Kanada vətəndaşlarının da olduğu altı sərnişinin taleyi naməlum olaraq qalır.


İtaliya mətbuatının məlumatına görə, hələ də itkin düşənlərin kabinələrində sıxışıb qalması ilə bağlı ümidlər var. Daga əvvəl isə dalğıclar yaxtanın pəncərələrindən cəsədlər gördüklərini bildirmişdilər.


"Bu yaxta başdan-başa işıqlı idi. Səhər saat 4.30 radələrində o yoxa çıxdı. Əyləncəli yaxta idi. Dənizdə şən keçən adi bir tətil faciəyə çevrildi. Yaxta limana çox yaxın olub, sığınacaq götürə bilərdilər, lakin fırtına onları çaşdırıb"-deyə xilasedicilər bildirir.
 

“Bayesian” yaxtasının son şəkli

Qeyd edək ki, bir neçə həftə əvvəl San Fransisko məhkəməsi 2011-ci ildə “Hewlett-Packard”a “Autonomy” firmasının 11 milyard dollarlıq satışı ilə bağlı Mayk Linçə bəraət qazandırıb. Hüquqi mübarizə 12 il davam edib.


Mayk Linç kimdir?

59 yaşlı texnoloji dahi Mayk Linç Britaniyanın Bill Qeytsi adlandırılır. Onun sərvəti 852 milyon funt sterlinq olaraq qiymətləndirilir. Batmış “Bayesian” yaxtasının sahibi olduğu güman edilir.


13 il əvvəl şirkətini 11 milyard dollara satdıqdan sonra bu, texnologiya maqnatı, Ceyms Bond fanatı Mayk üçün böyük bir qələbə olub.
 

Esseksin İlford şəhərində anadan olan Mayk Linçin vəkili, əvvəllər Ceffri Epşteyn və Roman Polanskini təmsil edən vəkil olub.


Onun şöhrətə və var-dövlətə yüksəlməsi Britaniyada böyük və təməlqoyma uğur hekayəsi kimi qarşılanıb. Evli iki qız atası 2006-cı ildə sahibkarlığa xidmətlərinə görə OBE mükafatına layiq görülüb.

Aysel

Sfera.az