Lavrov “Şimal axını”ndakı partlayışlara görə ABŞ-ni günahlandırdı
Rusiyanın xarici işlər naziri Sergey Lavrov “Şimal axını” borularındakı partlayışlara görə ABŞ-ni günahlandırıb.
Sfera.az bildirir ki, bu barədə “Associated Press News” agentliyi məlumat yayıb. Lavrov yenidən 2022-ci ildə Rusiyadan Avropaya təbii qaz daşıyan “Şimal axını 1” və “Şimal axını 2” boru kəmərlərində baş verən partlayışlardan danışıb.
“Aydındır ki, belə bir terror aktının həyata keçirilməsi üçün yuxarıdan göstəriş verilib. Necə deyərlər, Qərb üçün zirvə nöqtəsi təbii ki, Vaşinqtondur”, - o qeyd edib.
Xatırladaq ki, alman prokurorları 2022-ci ildə baş vermiş təxribatla bağlı Ukrayna vətəndaşının həbsinə order verib. "Volodimir Z” olaraq bilinən şəxsin boru kəmərlərinə partlayıcı qurğu yerləşdirən dalğıclardan biri olduğu qeyd edilib. Kiyev isə partlayışlarda Ukraynanın rolu olması iddiasını rədd edərək, bunu “cəfəngiyyat” adlandırıb.
Günay
