Ermənistanın Naxçıvanı atəşə tutmaqdakı məqsədi nədir? - AÇIQLAMA
Xəbər verdiyimiz kimi, bu gün saat 03:20 radələrində Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Sədərək rayonu istiqamətində yerləşən mövqelərini atıcı silahlardan atəşə tutub. Ümumiyyətlə, bu proses iki gündür davam edir. Ermənistan silahlı qüvvələrinin bölmələri Azərbaycanla sərhədin Naxçıvan istiqamətində atəşkəsi pozur.
Bununla bağlı Sfera.az-a açıqlama verən siyasi şərhçi Aqşin Kərimov deyib ki, Rusiya-Ukrayna müharibəsinin trayektoriyasındakı dəyişiklik, Yaxın Şərqdə mümkün İsrail-İran qarşıdurmasının güclənmə ehtimalları Ermənistanın Azərbaycana qarşı geosiyasi fürsət kimi təxribat tempini qüvvətləndirir:
“Azərbaycan Ermənistanla sülh müqaviləsində öz şərtləri çərçivəsində irəliləyişlərə üstünlük verdiyini nümayiş etdirsə də, mümkün təxribatların geniş miqyas almaq ehtimalları prosesi hərbi fazaya keçirə bilər. Lakin Ermənistan həvəslənsə də, o, Azərbaycana qarşı planlarında mürəkkəb, bir-birilə üst-üstə düşməyən və səmərəsiz situasiyalarla üzləşəcək”.
A.Kərimov qeyd edib ki, sərhədin Naxçıvan istiqaməti Ermənistanın hərbi cəhətdən nisbətən möhkəm yeridir:
“Ancaq İrəvan Naxçıvan Əlahiddə Ümumqoşun Orduda olan ən müasir silahları, raketləri və xüsusi təyinatlılarla mümkün əməliyyatlar zamanı qarşılaşa biləcəyi çətinlikləri hesablaya bilmir. Ermənistan Azərbaycanın davamlı təzyiqlərinə tab gətirmək gücündə olmasa da, o, regional eskalasiya cəbhələrində rol almaqla enerji toplamağa çalışır”.
Günay
