İsrail-HƏMAS münaqişəsi: Türkiyənin cəhdi fayda verəcəkmi? - ŞƏRH

Türkiyədə İsraillə HƏMAS arasında məhbus mübadiləsi gözlənilir. Bu barədə “Haber Global” diplomatik mənbələrə istinadən bildirib.  Qeyd olunub ki, müzakirələrlə bağlı mətn, demək olar, hazırdır. Hələ dəqiq olmayan mətnin şərtlərinə görə, HƏMAS-ın əlindəki hər bir məhbusa görə 12 fələstinli geri qaytarılacaq. Məlumata görə, HƏMAS-ın əlində 120 israilli məhbus var. Vurğulanıb ki, Türkiyə Qəzzada atəşkəsə nail olmaq üçün səy göstərir. Həmçinin ABŞ, Qətər və Misirin də cəhdləri nəticəsində yaxın günlərdə müzakirələrin nəticə verəcəyi gözlənilir.

Maraqlıdır, HƏMAS İsraillə razılığa gələcəkmi?

Bununla bağlı Sfera.az-a açıqlama verən siyasi şərhçi Kənan Novruzov deyib ki, Türkiyə İsraillə HƏMAS arasında atəşkəsin əldə olunmasında maraqlıdır:

“Yaxın Şərqdə müharibə genişlənməyə doğru gedir. Bir müddətdən sonra elə vəziyyət yarana bilər ki, artıq geriyə yol qalmasın. Bu, bir çox siyasi aktor kimi Türkiyəyə də çətinlik yaradacaq. Odur ki, Ankara bütün imkanları ilə buna mane olmağa çalışır. Əgər Türkiyə bunu bacarsa, ABŞ-nin Yaxın Şərqlə bağlı oyununu pozmuş olacaq. İkinci tərəfdən, Türkiyənin HƏMAS-la İsrail arasında vasitəçilik etməsi utopik deyil. Xatırlatmaq yerinə düşər ki, Türkiyə bundan əvvəl ABŞ ilə Rusiya arasında məhbus mübadiləsinə ev sahibliyi etmişdi.  Ümumiyyətlə, etiraf etmək lazımdır ki, rəsmi Ankara vasitəçilik diplomatiyasında kifayət qədər uğurludur”.

K.Novruzov qeyd edib ki, perspektivdə Türkiyənin vasitəçiliyi ilə İsrail və HƏMAS arasında məhbus mübadiləsinin olması mümkündür:

“Bu yəqin ki, Yaxın Şərqdə “suların durulmasına”, gərginliyin səngiməsinə kömək edəcək. Hərçənd ABŞ mümkün qədər çalışacaq ki, bu prosesin qarşısını alsın. Bunun üçün İsrailə hərbi-siyasi dəstəyin artırılması gözləniləndir. Yaxın Şərqdə danışıqların başlanması ilə bağlı ehtimallar daha əvvəlki qədər az deyil. HƏMAS da danışıqlarda maraqlı görünür, amma prosesin başlanması üçün cəld tərpənmək lazımdır. Əks halda sonra gec ola bilər”.

Günay Rəsulqızı