Ukraynanın Kurska hücumunun İKİ MƏQSƏDİ - ŞƏRH
Xəbər verdiyimiz kimi, Ukrayna ordusu 6 avqustdan Kursk vilayətinə hücum edib və 11 yaşayış məntəqəsinə nəzarəti ələ keçirib. Bu hadisə dünya mediasında da gündəm olub, hücumun səbəbləri barədə müxtəlif versiyalar irəli sürülüb.
Bununla bağlı Sfera.az-a açıqlama verən siyasi şərhçi Şahin Cəfərli deyib ki, Ukrayna əsgərlərinin Rusiyanın Kursk vilayətinə daxil olması xüsusi hərbi əməliyyatdır. O xatırladıb ki, son məlumata görə, Ukrayna ordusu 25 km dərinliyə qədər irəliləyib:
“Avropaya qaz nəqlini təmin edən Sudja qazölçmə stansiyası nəzarətə götürülüb, xeyli Rusiya əsgəri əsir düşüb. Ukrayna ordusunun Sudja şəhərini də nəzarətə götürdüyü barədə təsdiq olunmamış məlumatlar var. Fikrimcə, Ukrayna siyasi-hərbi rəhbərliyi bu əməliyyatda 2 məqsəd güdə bilər. Birincisi, Rusiya komandanlığını Donbasdakı qüvvələrinin bir qismini Kursk yanğınını söndürmək üçün geri çəkməsinə nail olmaq. Hazırda Donbasda - Pokrovsk istiqamətində Ukrayna üçün mürəkkəb vəziyyət yaranıb. Rusiya komandanlığı bu istiqamətdə ciddi perspektiv görərək rezervlərini buraya yönəldir və Ukrayna müdafiəçiləri üzərində təzyiqi hər gün artıraraq irəliləyir. İkincisi, Kiyev Rusiya ərazilərinin bir qismini, o cümlədən Kurskdakı strateji obyektləri ələ keçirərək orada möhkəmlənmək və beləliklə, danışıqlar masasında əlini gücləndirmək istəyir. Bu, çox çətin vəzifədir və müxtəlif amillərdən, o cümlədən Ukraynanın bu əməliyyata nə qədər qüvvə cəlb etməsindən asılıdır”.
Ş.Cəfərli qeyd edib ki, Rusiya hazırda itirdiyi əraziləri geri almaq üçün bütün gücünü səfərbər edir:
“Müharibənin gedişatını dəyişdirmək üçün Ukrayna tərəfindən qeyri-standart addımlara ehtiyac var və Kursk əməliyyatı bu tip addımlardan biridir. Nəticələri necə olacaq, onu demək çətindir”.
Günay
