Rusiya Xarici İşlər Nazirliyi Sankt-Peterburqda hərbi dəniz paradında Rusiya Prezidenti Vladimir Putinə sui-qəsdin hazırlanması ilə bağlı mətbuatda yer alan yazıları yanlış adlandırıb.

Sfera.az xəbər verir ki, bu barədə idarənin Telegram kanalında məlumat verilib.

Xarici İşlər Nazirliyi qeyd edib ki, bu mesajlar Rusiya xarici işlər nazirinin müavini Sergey Ryabkovun avqustun 4-də “Rossiya-1” telekanalına verdiyi müsahibənin “jurnalistlər tərəfindən yanlış təfsirinin nəticəsidir”.

Burada iyulun 12-də müdafiə naziri Andrey Belousovla amerikalı həmkarı Lloyd Ostin arasında baş tutan telefon danışığından bəhs edilib. Söhbət zamanı Moskvanın Rusiyaya qarşı planlaşdırılan təxribatla bağlı narahatlığı Amerika tərəfinə çatdırılıb.

“Eyni zamanda, S.A. Ryabkov digər departamentlərin səlahiyyətlərinə aid olan təfərrüatlara varmayıb”, - Rusiya Xarici İşlər Nazirliyi bildirib.

Sankt-Peterburqdakı dəniz paradında aksiyanın hazırlanıb-hazırlanmaması ilə bağlı birbaşa sualı cavablandıran Ryabkov yalnız “bu cür hadisələrlə müəyyən əlaqənin olduğunu” etiraf edib.

Bununla bağlı Rusiya Xarici İşlər Nazirliyi media nümayəndələrini dərc olunmuş məlumatları diqqətlə yoxlamağa çağırıb.

Avqustun 6-da bildirilib ki, bu il Sankt-Peterburqda Hərbi Dəniz Gününə həsr olunmuş dəniz paradı təhlükəsizlik təhdidləri səbəbindən kəsilmiş formada keçirilib. Məlumata görə, Kronştadtdakı paradın ikinci hissəsi təxribat və hücum qorxusu səbəbindən ləğv edilib.

İnci
Sfera.az