""İnstagram"ın bağlanmasına Ərdoğanın mövqeyi anlaşılandır” - AÇIQLAMA

"Əslində son illərdə dövlət başçıları ilə qlobal resurslar arasında bu formada gərginlik təzə bir şey deyil. 4-5 il öncə Tramp ilə qlobal media resursları arasında baş verənlər unudulmamalıdır. Son illərdə qlobal sosial media resursları ("Facebook", "İnstagram", "YouTube" və s.) xeyli siyasiləşib, ikili standartlar artıb. Bir çox hallarda bu resurslar vasitəsilə sərbəst fikir bildirməkdə problemlər yaranır".
Sfera.az xəbər verir ki, bu barədə fikirləri Azərbaycan İnternet Forumunun Prezidenti Osman Gündüz bildirib.
“Əsas səbəb isə bu resursların özləri tərəfindən uzun illər oturuşan və hamını qane edən prinsipin, "məzmuna istifadəçi cavabdehdir" prinsipinin pozulması olub. Yəni qlobal resurslar məzmuna, ifadə azadlığına ikili standartlarla müdaxiləyə başladığı andan bu tip qapanmalar, kontentin silinməsi, "kontent saxta ola bilər" kimi işarələnməsi və s. reallığa çevrilib. Məhz bu səbəbdən, sosial resursların hüdudsuz hakimiyyət əldə etməsindən dolayı 5 il öncə Tramp bu resurslarla bağlı ciddi bir tənzimləmə hazırlayıb. Prinsip ondan ibarət idi ki, əgər qlobal resurs artıq kontenti redaktə edirsə, bu, artıq ifadə azadlığının pozulmasıdır. Yəni indiyədək mövcud olan "kontentə istifadəçi cavabdehdir" prinsipi pozulursa, onda qlobal resurslar da tənzimlənməyə cəlb olunmalıdır. Tramp o zaman bunu reallaşdıra bilmədi”.
Osman Gündüz qeyd edib ki, indi həmin məsələ Türkiyədə baş verib.
“"Meta" şirkəti İranda qətlə yetirilən HƏMAS lideri İsmayıl Haniyə ilə bağlı Türkiyədəki paylaşımları "İnstagram"dan silib. Yəni qlobal resurs yenə kontentə müdaxilə edib, yenə "redaktorluq" edib. Amma "Meta" Türkiyənin terrorçu hesab etdiklərilə bağlı çoxsaylı paylaşımları "İnstagram"dan silməyib. Bu baxımdan "İnstagram"ın qapadılması ilə bağlı Türkiyə hökumətinin, Prezident Ərdoğanın mövqeyi anlaşılandır. Amma dövlət maraqlarının reallaşması istiqamətində Türkiyənin atdığı addımlar, "baltanın kökündən vurulması" çox sərt olub, ədalətli deyil. "İnstagram" Türkiyədə ən populyar, ən çox ictimai və biznes əhəmiyyəti olan sosial platformadır. Türkiyədə milyonlarla insanın burada böyük biznesi var, milyonlarla insanlar burada işləyir. Türkiyə "İnstagram"ı sadə bir şey deyil, milyonların "oturduğu" biznes və ictimai bir platformadır. İctimai fikrin formalaşmasına təsir edən bir platformadır. Yəni Türkiyə cəmiyyəti üçün bu platforma yetərincə əhəmiyyətli bir resursdur. Əlbəttə, "Meta" da Türkiyənin rəqəmsal bazarından milyonlar qazanır. Bu baxımdan, problemin əvvəllər olduğu kimi, xəbərdarlıqlar, danışıqlar, müvəqqəti məhdudlaşmalarla, "Meta" ilə əməkdaşlıqla həll etmək doğru yanaşma olardı. Türkiyənin özünün də bu sahədə təcrübəsi var. Ümid edirəm qısa zamanda problem öz həllini tapacaq və "İnstagram" Türkiyədə fəaliyyətini bərpa edəcək. Düşünürəm ki, qlobal sosial media resursları "redaktor" səlahiyyətlərinə iddialı olduqca, ifadə azadlığına qarşı ikili standartlardan əl çəkmədikcə bu tip problemlər hələ çox davam edəcək. Bunun həlli yolu tapılmalıdır”.
Ülkər Abdurahmanlı