Qarabağ Universitetində yeni TƏYİNAT - FOTO

ABŞ-nin Corc Vaşinqton Universiteti (CVU) ilə Azərbaycan Dövlət Pedaqoji Universiteti (ADPU) arasındakı ikili diplom proqramının məzunu Abdulxaliq Məmmədli Qarabağ Universitetinin Mükəmməllik mərkəzinə direktor təyin olunub.

Bu barədə universitetdən Sfera.az-a məlumat verilib.

Bildirlib ki, Abdulxaliq Məmmədli İstanbul Universitetində ingilis dili müəllimliyi ixtisası üzrə bakalavriat, Azərbaycan Dövlət Pedaqoji Universitetində (ADPU) təhsilin təşkili və idarə olunması ixtisası üzrə magistratura səviyyələrində təhsil alıb. Sonra ABŞ-nin Corc Vaşinqton Universiteti (CVU) ilə ADPU arasındakı ikili diplom proqramında təhsil siyasəti və idarəetməsi ixtisası üzrə ikinci dəfə magistratura təhsili alıb.

Bundan əlavə, Azərbaycan Respublikası Təhsil İnstitutunda təhsilin təşkili və planlaşdırılması ixtisası üzrə doktorantura səviyyəsini bitirib. Abdulxaliq Məmmədli 2012–2017-ci illərdə Qafqaz Universitetində (indiki Bakı Mühəndislik Universiteti) müəllim, Test mərkəzinin rəhbəri və ingilis dili üzrə metodbirləşmə rəhbəri vəzifələrində çalışıb.

Abdulxaliq Məmmədli sonrakı dövrlərdə Bakı Dövlət Universiteti, Azərbaycan Dövlət İqtisad Universiteti, Xəzər Universiteti və Azərbaycan Dillər Universiteti kimi nüfuzlu ali təhsil müəssisələrində müəllimlik edib.

Komandanın yeni üzvünü təbrik edir, fəaliyyətində uğurlar arzulayırıq!

Firuzə Əliyeva