Krım uğrunda gedən GƏRGİN MÜBARİZƏ: "İmkanlar tükənir və yaxın vaxtda..." - ŞƏRH

Ukrayna ordusunun Ali baş komandanı Aleksandr Sırski deyib ki, Ukrayna Krımı qaytarmaq üçün bütün vasitələrdən istifadə edəcək. O bildirib ki, Rusiya cəbhə xəttinə Ukraynadan üç dəfə daha çox hərbi texnika cəlb edib və şəxsi heyət sayı ilin sonuna qədər 690 min nəfərə çatdırılacaq. Bununa belə, A. Sırski Ukrayna ordusunun itkilərinin sayını açıqlamayıb.

Bəs Krım niyə bu qədər əhəmiyyətlidir və bu yarımada uğrunda mübarizə kimin xeyrinə nəticələnə bilər?

Mövzu ilə bağlı Sfera.az-a açıqlama verən politoloq Kənan Novruzov bildirib ki, hazırda Ukraynada mövqe müharibəsi gedir. Tərəflərdən heç biri üstünlük əldə edə bilmir. Həm Ukrayna, həm də Rusiya getdikcə yorulur, imkanları tükənir. K.Novruzov qeyd edib ki, Krım hər iki tərəf üçün xüsusi əhəmiyyətlidir:

“Birincisi, ona görə ki, yarımada hərbi baxımdan strateji önəmə sahibdir. İkincisi, tərəflər arasında qarşıdurma 2014-cü ildə məhz Krıma görə başlamışdı. Yəni Krımın azad olunması Kiyevə həm də psixoloji üstünlük qazandıra bilər. Üçüncüsü, Rusiya Krımda çox ciddi şəkildə hərbi baza yaradıb. Ukrayna perspektivdə Krımı azad etməklə Rusiyanın hərbi imkanlarını xeyli zəiflədə bilər. Bu isə müharibənin gedişinə təsir edəcək”.

Siyasi şərhçinin sözlərinə görə, Ukrayna müntəzəm olaraq Krıma hava zərbələri endirib, ərazidə xüsusi əməliyyatlar keçirsə də, bu, yarımadanın azad edilməsi üçün kifayət deyil:

“Ukraynanın sözügedən addımlarının ən yaxşı nəticələrindən biri odur ki, Krımdakı Rusiya əhalisi təşvişə düşür və tədricən ərazini tərk edir. Ukraynanın Krıma quru yolla çıxışı yoxdur. Deməli, yarımadanın azad edilməsi üçün ciddi hava əməliyyatlarına, hücumlarına ehtiyac var. Bu isə F-16 qırıcı təyyarələrinin Ukraynaya tədarükünü zəruri edir. Amma Qərb ölkələrinin vədlərinə baxmayaraq, proses hələ ki, ləngiyir. Sözügedən qırıcılarsız isə Ukraynanın Krımda nəticəyönümlü hava əməliyyatları keçirməsi və yarımadanı azad etməsi ən yaxşı halda çətindir”.

K.Novruzov vurğulayıb ki, hazırda Rusiyanın vəziyyəti Ukraynaya nisbətən daha yaxşıdır:

“Çünki Rusiyanın şəxsi heyət və texnikası daha çoxdur. Bunu general A.Sırski özü də etiraf etdi. Belə olan halda, Krımın yaxın vaxtda azad olunacağı və vəziyyətin kəskin şəkildə Ukraynanın xeyrinə dəyişəcəyi ağlabatan görünmür. Əgər müharibənin gedişatı yarımadanın taleyindən asılıdırsa, onda, deməli, sülh yaxın vaxtda olmayacaq, savaş hələ uzun çəkəcək”.

Firuzə Əliyeva