İsrail Qəzzadə əməliyyatlara başladı - Regionun taleyi necə olacaq?

İsrail ordusu Qəzzada yeni hərbi əməliyyatlara başlayıb. Məlumata görə, bu dəfə əməliyyatların əsas hədəfi bölgəni tam nəzarətə götürməkdir. 

Xatırladaq ki, İsrail 1967-ci ildə Qəzzanı nəzarət altına alıb və uzun müddət buranı idarə edib. Amma 1996-ci ildə Oslo razılaşmasına uyğun olaraq Qəzza yenidən Misirin idarəetməsinə qaytarılıb. Misir isə bir müddət sonra buranın idarəetməsini Fələstinə verib. 

2006-cı ildə keçirilən seçkilərdə Qəzzada hakimiyyətə HƏMAS təşkilatı gəlib və həmin tarixdən İsraillə Qəzza arasında hərbi qarşıdurmalar fasilələrlə davam edir. 
İsrailin Qəzzanı yenidən nəzarətə götürməsindən sonra necə davranacağı maraq doğurub. 

Hamını düşündürən sual budur ki, İsrail Qəzzanın idarəetməsini başqa dövlətə etibar edəcəkmi, yoxsa Qəzza  həmişəlik İsrailin nəzarətində qalacaq?

 

Sfera.az-a bu barədə açıqlama verən politoloq Züriyə Qarayeva İsrailin Qəzzada başladığı yeni hərbi əməliyyatların bölgənin taleyi ilə bağlı ciddi suallar doğurduğunu deyib.

Onun sözlərinə görə, Rəsmi Təl-Əvivin məqsədi bu dəfə yalnız qısamüddətli hərbi uğur qazanmaq deyil, ərazidə daha geniş nəzarət mexanizmi qurmaqdır:

 

“Ancaq tarixi təcrübə göstərir ki, Qəzzanın tam və uzunmüddətli şəkildə İsrailin idarəsinə keçməsi real deyil. Birincisi, Qəzza uzun illərdir həm silahlı müqavimətin, həm də beynəlxalq humanitar dəstəyin mərkəzi sayılır. Burada möhkəmlənmək İsrail üçün böyük hərbi və iqtisadi yük deməkdir. İkincisi, region dövlətlərinin, xüsusən də Misir və ərəb ölkələrinin mövqeyi belə bir addımın qarşısında ciddi maneədir. Çünki Qəzzanın tam ilhaqı yalnız Fələstin məsələsini daha da kəskinləşdirər, diplomatik böhranı dərinləşdirər”.

 

Politoloq İsrailin Qəzzada tam nəzarət istəyinin daxili auditoriyaya da mesaj xarakteri daşıdığını qeyd edib.

O əlavə edib ki, İsrail hakimiyyəti cəmiyyətə təhlükəsizliyin bərpa olunacağı, sərhədlərin qorunacağı və radikal qrupların zəiflədiləcəyi göstərilmək istəyir:

 

“Amma praktik planda bu, daha çox hərbi əməliyyatların intensivləşməsi, müvəqqəti zonaların yaradılması və məhdud inzibati müdaxilə ilə məhdudlaşa bilər. Nəticə etibarilə, İsrailin Qəzzanı həmişəlik öz nəzarəti altına alması çətin görünür. Daha real variant bölgənin hərbi-siyasi təzyiq altında saxlanılması və zamanla beynəlxalq vasitəçilərin iştirakı ilə müəyyən idarəetmə modellərinin gündəmə gətirilməsidir”.

 

Fidan Hacızadə
Sfera.az