Şimali Kipr TDT-yə üzv ola biləcək? - ŞƏRH
Türkiyə Prezidenti Rəcəb Tayyib Ərdoğan ABŞ-yə yola düşməzdən əvvəl Esenboğa hava limanında keçirdiyi mətbuat konfransında deyib ki, Şimali Kipr, demək olar, Türk Dövlətləri Təşkilatının (TDT) tamhüquqlu üzvüdür. O, bildirib ki, Azərbaycan da bunu dəstəkləyir: “Şimali Kipr TDT-nin Şuşada keçirilən iclasında təmsil olundu. İndi biz çalışırıq ki, tamhüquqlu üzvü rəsmiləşdirək”.
Bununla bağlı Sfera.az-a açıqlama verən siyasi şərhçi Kənan Novruzov deyib ki, Ankara Şimali Kiprin TDT-yə üzvlüyündə xüsusilə maraqlıdır.
Onun sözlərinə görə, bu, Türkiyə üçün strateji əhəmiyyətli məsələdir:
“Şimali Kiprin TDT-yə üzvlüyü Türkiyə üçün xüsusilə iki cəhətdən əhəmiyyətlidir. Birincisi, bu, TDT-nin daha da güclənməsi və genişlənməsi deməkdir. Bu isə özlüyündə nəinki Ankara və Bakının, digər üzv dövlətlərin də xarici siyasət kursuna uyğundur. İkincisi, Şimali Kiprin TDT-yə üzvlüyü perspektivdə Türkiyənin Balkanlarla bağlı xarici siyasət kursuna, o cümlədən Yunanıstanla adalar məsələsinin həllinə kömək ola bilər”.
K.Novruzov bildirib ki, Şimali Kiprin TDT-yə üzvlüyünə mane olmaq istəyənlər də var:
“Onlar təşkilatın genişlənməsini və güclənməsini istəməyənlərdir. Amma düşünmək olar ki, üzv dövlətlərin, xüsusilə Bakı və Ankaranın səyləri, davamlı dəstəyi nəticəsində Şimali Kipr gələcəkdə TDT-nin tamhüquqlu üzvü olacaq. Bu, TDT-nin gələcək illərdəki iclaslarında elan edilə bilər”.
Günay
