Rəşid Behbudovun 100 illiyinə həsr olunmuş yubiley gecəsi keçiriləcək
Dekabrın 14-də Heydər Əliyev Sarayında SSRİ və Azərbaycanın Xalq artisti Rəşid Behbudovun anadan olmasının 100 illiyinə həsr olunmuş yubiley gecəsi keçiriləcək.
Mədəniyyət və Turizm Nazirliyinin İnformasiya və ictimaiyyətlə əlaqələr şöbəsindən Oxu.Az-a verilən məlumata görə, yubiley tədbirində R.Behbudovun Azərbaycan musiqisinin inkişafındakı xidmətlərindən danışılacaq, sənətkarın mahnıları səslənəcək.
Rəşid Behbudov 1915-ci il dekabr ayının 14-də Tbilisi şəhərində xanəndə Məcid Behbudalı oğlu Behbudovun ailəsində anadan olub. O, Azərbaycan xalq mahnılarının və Azərbaycan bəstəkarlarının vokal əsərlərinin xarici ölkələrdə populyarlaşmasında böyük rol oynayıb. Azərbaycan mahnıları ilə yanaşı o, 50-dən artıq xarici mahnını da həmin xalqın dilində ifa edib.
Rəşid Behbudov 1946-cı ildə SSRİ Dövlət mükafatı laureatı, 1959-cu ildə SSRİ Xalq artisti, 1978-ci ildə Azərbaycan Respublikasının Dövlət mükafatı laureatı, 1980-cı ildə Sosialist Əməyi Qəhrəmanı və "Lenin” ordeni kimi fəxri ad və titullara layiq görülüb. O, Azərbaycan SSR Ali Sovetinə (3-6-cı çağırış) və SSRİ Ali Sovetinə (7-9-cu çağırış) deputat seçilib.
1989-cu il iyunun 9-da görkəmli müğənni vəfat edib. O, Fəxri xiyabanda dəfn olunub, məzarı üstündə qəbrüstü abidə ucaldılıb.
