Çin Rusiyaya görə Qərbi HƏDƏLƏDİ: "Tezliklə cəsəd torbaları ilə dolacaq”
ABŞ-nin Ukrayna ilə bağlı son qərarı gərginlik yaratmaqda davam edir.
Sfera.az bildirir ki, Vaşinqton Kiyevə öz silahları vasitəsilə Rusiyaya zərbələr endirməyə icazə verdikdən sonra Çin də məsələyə müdaxilə edib. Belə ki, Pekin NATO-nu fəlakətli nəticə ilə hədələyib. Bu barədə Çinin “Asiatimes” nəşri məlumat yayıb.
“Avropa tezliklə “cəsəd torbaları” ilə dolacaq”, - nəşr qeyd edib.
Vurğulanıb ki, NATO daxilində alyansın Ukrayna münaqişəsində iştirakı ilə bağlı müxtəlif fikirlər də mövcuddur: “Macarıstan NATO-nun savaşda iştirakına və Rusiya ərazisinə hücumlara etiraz edir. İtaliya da bu fikrə qarşıdır. Bununla belə, Almaniya dəstəyini bəyan edir, lakin Kiyevi Rusiya Federasiyasının dərinliklərinə hücumlar üçün “Taurus” raketləri ilə təmin etmir”.
Materialda qeyd edilib ki, ABŞ-nin yeni siyasəti Rusiya ilə münasibətlərdə gərginliyə səbəb ola bilər: “Ən çox ehtimal olunan nəticə Ukraynada münaqişənin davam etməsidir. Bu da Şimali Atlantika Alyansı üçün əlavə itkilərə, o cümlədən əsgərlərin həyatına səbəb olacaq. NATO təyyarələrinin və ya quru qüvvələrinin Kiyev ərazisində mümkün istifadəsi planları Avropa üçün fəlakətli nəticələrə gətirib çıxaracaq”.
Xatırladaq ki, ABŞ Prezidenti Co Bayden Kiyevə Rusiya ərazisinə zərbələr endirməyə icazə verib. Lakin bəzi ekspertlər bunun nüvə münaqişəsinə gətirib çıxara biləcəyi istiqamətində xəbərdarlıqlar edib.
Günay
