Rusiya “Taliban”ı qadağan olunmuş qruplar siyahısından ÇIXARA BİLƏR
Rusiyada “Taliban” qadağan olunmuş qruplar siyahısından çıxarıla bilər.
Sfera.az bildirir ki, bu barədə “TASS”a Rusiya xarici işlər nazirliyinin ikinci Asiya departamentinin direktoru Zamir Kabulov deyib.
O qeyd edib ki, məsələ ilə bağlı artıq Rusiya Prezidenti Vladimir Putinə məlumat verilib.
“Rusiya Federasiyası Xarici İşlər Nazirliyi və Ədliyyə Nazirliyi Prezident Vladimir Putinə məlumat verib ki, “Taliban” hərəkatı qadağan olunmuş təşkilatlar siyahısından çıxarıla bilər”, - Kabulov bildirib.
O, XİN-in bu məsələdə hansı mövqe tutduğu sualına “müsbətdir” cavabını verib.
“Lakin “Taliban” qadağan olunmuş qruplar siyahısından çıxarılmayana kimi onun tanınması haqqında danışmaq tez olacaq. Bütün mülahizələrlə bağlı Rusiyanın ali rəhbərliyinə məlumat verilib. Qərarın verilməsini gözləyirik”, - qurum rəsmisi deyib.
Onun sözlərinə görə, “Taliban” hökumətinin Rusiya Federasiyası tərəfindən tanınması 2021-ci illə müqayisədə indi daha realdır: “Ancaq hələ də aradan qaldırılmalı olan bəzi mövzular var. Bundan sonra Rusiya rəhbərliyi qərar verəcək”.
Diplomat onu da bildirib ki, Moskvanın Rusiya ilə Əfqanıstan arasında diplomatik münasibətlərin qurulmasının 105-ci ildönümü ilə əlaqədar “Taliban” hökuməti ilə hər hansı tədbir keçirmək və ya təbrik teleqramları mübadiləsi aparmaq planları yoxdur. O, səbəb kimi formal qaydaları, yəni rəsmi tanınmamaq məsələsini vurğulayıb.
Günay
