ABŞ Avropa banklarını sanksiya ilə HƏDƏLƏDİ: “Bu əməliyyatlar dayandırılmasa...”

ABŞ maliyyə naziri Janet Yellen Rusiya ilə əməkdaşlıq edən bəzi Avropa banklarını hədələyib.

Sfera.az “Bloomberg”ə istinadən xəbər verir ki, Yellen həmin banklara qarşı ikinci dərəcəli sanksiyaların gücləndiriləcəyini söyləyib.

ABŞ tərəfi bildirib ki, bəzi avropalı banklar Rusiyaya müharibə ilə bağlı xərclər üzrə əməliyyatların həyata keçirilməsinə köməklik edir. Yellen “Reuters” agentliyinə açıqlamasında açıq şəkildə deyib ki, ABŞ Rusiyada bizneslə məşğul olan banklara qarşı sanksiyaları sərtləşdirəcək.

Amerikalı nazir sanksiyaların təfərrüatlarını açıqlamamaqla yanaşı, hansı bankları nəzərdə tutduqlarını da söyləməyib.

Xatırladaq ki, ABŞ Prezidenti Co Bayden Maliyyə Nazirliyinə Rusiya və digər ölkələrin təşkilatlarına tətbiq edilən sanksiyalardan yayınmağa kömək edən bankları ABŞ maliyyə sistemindən çıxarmaq səlahiyyəti verib.

Yellen ifadə edib ki, Rusiya iqtisadiyyatı getdikcə müharibə iqtisadiyyatına çevrilir və mülki, hərbi və ya ikili məqsədli əməliyyatları ayırd etmək çətinləşir. O, buna görə də Rusiya ilə daha çox əməkdaşlıq edən bəzi banklara qarşı ikinci dərəcəli sanksiyaların tətbiq edilməsi zərurətinin yaradıldığını vurğulayıb.

Qeyd edək ki, ikinci dərəcəli sanksiyalar konkret təşkilatlara qarşı tətbiq edilir. İndiyə qədər Çinin, Birləşmiş Ərəb Əmirliyinin və Türkiyənin bəzi bankları bu sanksiyalarla üzləşiblər. Həmin sanksiyalar ümumi xarakterli olmur, yalnız Rusiya ilə əməliyyat həyata keçirildiyi aşkarlandıqda tətbiq edilir.

ABŞ iddia edir ki, Rusiya sanksiyaya məruz qalmayan ölkələrin bankları ilə əməkdaşlıq etməklə zəruri olan ehtiyat hissələrini əldə edir və bunun sayəsinda silah istehsalını artırır.

Vasif