“İndiki cəbhə xətti qalmaqla…” - Putinin atəşkəs üçün şərtləri MƏLUM OLDU

"Rusiya Prezidenti Vladimir Putin Ukrayna ilə hazırkı cəbhə xətti qalmaqla atəşkəsə razıdır". 

Sfera.az xarici mediaya istinadən xəbər verir ki, bunu “Reuters”ə  Putinə yaxın olan şəxslər danışıb. 

Həmin şəxslərin verdiyi məlumata görə, müharibədə əldə edilən nəticələr saxlanılmaqla müharibəni dayandırmaq mümkündür. Amma Ukrayna və Qərb dövlətləri buna müsbət cavab verməsə, Rusiya müharibəni davam etdirməkdən çəkinməyəcək. 

Putinlə işləmiş və Kremldə yüksək səviyyəli danışıqlardan xəbəri olan mənbə deyib ki, Putin lazım olduğu qədər döyüşə bilər, lakin o, müharibəni dayandırmaq üçün atəşkəsə də hazırdır. 

“Reuters” agentliyi bu məlumatı Putinlə işləyən və ya işləmiş, siyasətdə və biznesdə yüksək vəzifə tutan ümumilikdə beş nəfərdən öyrənib. 

İddiaya görə Putin ikinci səfərbərliyin həyata keçirilməsini istəmir. Çünki 2022-ci ilin sentyabrında birinci səfərbərlikdən sonra onun nüfuzu xeyli azalıb. Bu iddia sahibləri hesab edir ki, nə qədər çətin olsa da Putin mövcud qüvvə ilə müharibəni davam etdirmək və daha yaxşı nəticələr əldə etmək istəyir. 

Qərb analitikləri isə hesab edir ki, Putinin “işğal edilən ərazilər qalmaqla atəşkəs olsun” istəyini Qərb və Ukrayna qəbul etməyəcək. Buna görə də indiki şərtlərlə müharibənin dayanması ehtimalı zəifdir.

Vasif