Ən çox qazanan videobloger açıqlandı

"YouTube”da ən çox qazanan bloger ikinci dəfə 27 yaşlı isveçli Feliks Kyellberq olub.

 

İKT.lent.az-ın "Forbes”a istinadən verdiyi xəbərə görə, "PewDiePie” niki ilə tanınan F. Kyellberq 2015-ci ilin iyunundan 2016-cı ilin iyununa qədər 15 milyon dollar qazanıb. "PewDiePie” nikli bloger "Let’s play” janrında videolar yayır. O, eyni anda həm videooyun oynayır, həm də oyunların gedişini şərh edir. F. Kyellberqin "YouTube” kanalının 50 milyondan çox abunəçisi var. Onun gəliri ötən il buraxdığı kitabın da təsiri ilə 20% artıb.  

 

"Forbes”ın reytinqində ikinci yeri pranker Roman Etvud tutub. O, 8 milyon dollar qazanıb. R. Etvud qazancının bir hissəsini suvenirlərin satışından və "Natural Born Pranksters” filminin istehsalından əldə edib.

 

Üçüncü sırada stendap-komik Lilli Singh gəlir. Onun sərvəti il ərzində üç dəfə - 7,2 milyon dollara qədər artıb. L. Singhin 10,2 milyon abunəçisi var. Blogerliklə yanaşı, o, öz brendi ilə satdığı məhsullardan da pul qazanır.

 

Reytinq cədvəlinə ümumilikdə 12 bloger daxil olub. Onlar il ərzində 70,5 milyon dollar qazanıblar ki, bu da ötən illə müqayisədə 23% çoxdur.