“Qarabağ Universitetinə rektor təyin olunmaq böyük fəxarətdir” – Şahin Bayramov 

Qarabağ Universitetinin rektoru təyin olunmaq Prezidentimiz tərəfindən bizə göstərilmiş çox böyük etimaddır.

Sfera.az xəbər verir ki, bunu Qarabağ Universitetinin rektoru Şahin Bayramov bildirib.

“Bu etimada görə Prezidentimizə sonsuz təşəkkürümü bildirirəm. Doğma Qarabağımızın adını daşıyan ali təhsil müəssisəsinə rektor təyin olunmaq sözlə ifadə edilməsi mümkün olmayan fəxarətdir. Qürur hissləri keçirirəm. Eyni zamanda, bu təyinat çox böyük məsuliyyətdir. Göstərilən etimadı doğrultmaq və yeni dövrün tələblərinə cavab verən müasir universitet qurmaq üçün var gücümüzlə çalışacağıq”.

Şahin Bayramov qeyd edib ki, Qarabağ Universiteti işğaldan azad olunan torpaqlarımızda fəaliyyət göstərəcək ilk ali təhsil müəssisəsi kimi tariximizə düşəcək.

“Doğma torpaqlarımızda fəaliyyət göstərmək şərəfdir. Bu şərəf və qürur hisslərinə görə, doğma torpaqlarımızı düşmən işğalından azad edən Müzəffər Ali Baş Komandanımıza minnətdarlığımı bildirir, Şəhid qardaşlarımıza Allahdan rəhmət diləyir, qazi qardaşlarımıza şəfa arzulayır, qəhrəman əsgər və zabitlərimizə təşəkkür edirəm”.

Ülkər Abdurahmanlı