Neft-qaz sektorunda kiçilmə davam edir – STATİSTİKA
Azərbaycanın neft-qaz sektorunda yaradılan əlavə dəyərin (ÜDM) real həcmində azalma 2024-cü ilin yanvar-aprel aylarında da davam edib.
Sfera.az rəsmi məlumatlara istinadən xəbər verir ki, bu il neft-qaz sektorunda ÜDM istehsalı 0,1 faiz azalıb.
Azalmaya səbəb neft hasilatının azalmasıdır. Azərbaycanda 2023-cü ilin yanvar-aprel aylarında 10,18 milyon ton neft hasil edildiyi halda bu ilin eyni dövründə 9,6 milyon ton hasil edilib. Müqayisə göstərir ki, bu il neft hasilatı 5,7 faiz azalıb.
Neft hasilatında azalmanın daha çox hissəsi “Azəri-Çıraq-Günəşli” yataqlar blokunda müşahidə olunub. Bir il əvvəl burada 6,2 milyon ton neft çıxarılmışdısa, bu il hasil edilən neftin miqdarı 5,5 milyon tona geriləyib.
2024-cü ilin ilk 4 ayında qaz hasilatı qismən artıb. Son bir ildə qaz hasilatı 16,2 milyard kub metrdən 16,7 milyard kub metrə çatıb. Qaz hasilatında artımın olmasına baxmayaraq, o, neft hasilatındakı azalmanı kompensasiya edə bilməyib.
Vasif
