Rəsm çəkmək uşaqların sağlamlığı üçün çox yaxşıdır - Maraqlı araşdırma

Dövrümüzün ən böyük problemlərindən biri də uşaqların telefonlara olan bağlılığıdır. Valideynlər uşaqları sakitləşdirmək üçün smartfonlardan istifadəyə üstünlük verirlər. Lakin uşaqların maraq dairələrini kəşf edərək onlara daha maraqlı hobbiləri aşılamaq olar.

Sfera.az xəbər verir ki, o hobbilərən biri də şəkil çəkməkdir. Şəkil çəkmək şübhəsiz ki, hər yaşda olan insana xoş gəlir və zövq verir. Xüsusilə də, uşaqlar üçün şəkil çəkmək bir ekrandan heç vaxt öyrənə bilməyəcəyi nüansları dərk etməsində mühüm rol oynayır.

Rəsm çəkməyin faydalarına gəldikdə isə, bu məşğuliyyət uşaqlarda əlləri, barmaqları və biləkləri ilə çox özəl hərəkətlər edə bilmək bacarığını qazandırır. Bundan savayı, uşaqların gördükləri və çəkdikləri arasında bir əlaqə olduğunu göstərən əl-göz koordinasiyası yaranır. Əl-göz koordinasiyası idmanla məşğul olmaqla yanaşı, həyatın bir çox sahəsində də vacibdir. Şəkil çəkmək eyni zamanda, uşaqlara diqqəti toplamağı və səbr etməyi öyrədən hobbidir.

Bir uşaq rəsm çəkərkən əşyanı müşahidə edir və onun çəkisi, boyu və digər əşyalarla olan əlaqəsini incələməyə məcbur olur. Gördüklərini kağızda çəkmək asan deyil və bunu doğru şəkildə etmək üçün səbr lazımdır.

Bu nüanslar uşaqlardakı şəkil çəkmək həvəsini və marağını artırır. Rəsm çəkmək uşaqların xəyal gücünü əks etdirdiyi kimi, yaradıcı düşünmələrinə də təkan verir.

Ülkər Abdurahmanlı