MAQATE baş direktorundan Zaporojye AES-lə bağlı HƏYƏCAN TƏBİLİ: "Hər an..."
“Zaporojye atom elektrik stansiyasına (ZNPP) olan son hücumlar stansiyanın təhlükəsizliyinə görə riskləri azaltmaq üçün razılaşdırılmış prinsiplərdən birini pozur”.
Sfera.az “TASS”a istinadən xəbər verir ki, bunu Beynəlxalq Atom Enerjisi Agentliyinin (MAQATE) baş direktoru Rafael Qrossi BMT Təhlükəsizlik Şurasının iclasında deyib.
“Son 10 gün ərzində bu prinsiplərdən birincisi dəfələrlə pozulub ki, bu da stansiyada nüvə təhlükəsizliyi və mühafizəsi üçün riskin artması deməkdir”.
Qrossi Təhlükəsizlik Şurasına xatırladıb ki, keçən il nüvə insidentinin qarşısını almaq üçün Zaporojye AES-də təhlükəsizliyin təmin edilməsi prinsiplərini açıqlayıb və Rusiya ilə Ukraynanı onlara riayət etməyə çağırıb. Onun sözlərinə görə, BMT Təhlükəsizlik Şurasının üzvləri və Ukrayna bu prinsipləri aydın şəkildə dəstəkləyir.
Qrossi əlavə edib ki, Zaporojye AES-də hələ də nüvə qəzası baş verə bilər:
“Hazırda stansiyanın altı reaktoru təhlükəyə qarşı hazır vəziyyətdə olsa belə, böyük nüvə qəzasının potensial təhlükələri real olaraq qalır. Biz nüvə qəzasının baş verməsinə çox yaxınıq. Qəza riskini minimuma endirmək üçün bu gün əlimizdən gələni etməliyik".
Qrossi həmçinin qeyd edib ki, agentlik Atom Elektrik Stansiyasına edilən son hücumlara görə kimin məsuliyyət daşıdığını təkzibedilməz dəlilləri olmayana qədər deməyəcək.
Agentliyin baş direktoru bildirib ki, MAQATE aprelin 16-da Zaporojye AES-də öz işçilərinin növbəti rotasiyasını həyata keçirəcək.
Xatırladaq ki, 2023-cü ilin mayında Qrossi BMT Təhlükəsizlik Şurasının Zaporojye AES-də təhlükəsizliyin təmin edilməsinin beş prinsipini dəstəkləməsini təklif edib:
AES-dən və ya ona qarşı heç bir hücum olmamalıdır
ZNPP zavodunda hücum üçün istifadə edilə bilən ağır silahlar, hərbi personal saxlanmamalı və ya baza kimi istifadə edilməməlidir
Stansiyadan kənar elektrik enerjisi riskə atılmamalıdır
ZNPP-nin təhlükəsiz istismarı üçün vacib olan bütün strukturlar və sistemlər hücumlardan və ya təxribat aktlarından qorunmalıdır;
Bu prinsipləri pozan heç bir addım atılmamalıdır.
Firuzə Əliyeva
