“Zəngəzur (TRİPP) dəhlizinin açılması Cənubi Qafqazda barışıq və inteqrasiyanın vacib struktur komponentidir”
“Ölkə Prezidenti cənab İlham Əliyevin Səudiyyə Ərəbistanının Əl-Ərəbiyyə telekanalının efirində yayımlanan müsahibəsində dövlət başçımıza ünvanlanan sualların əsas əhatə dairəsini bu ilin 8 avqust tarixində Vaşinqtonda, Ağ Evdə ABŞ Prezidenti Donald Tranpın təşəbbüsü ilə baş tutmuş Azərbaycan, ABŞ, Ermənistan ölkə rəhbərləri təfəfindən imzalanmış sənədlər mövzusu təşkil edirdi. İlk növbədə qeyd olunmalıdır ki, Vaşinqtonda imzalanmış birgə bəyanatın əhəmiyyəti həm rəmzi, həm də strateji məna daşıyır. Həmin sənədin Ermənistan tərəfdən – hansı şəxs tərəfindən imzalanmasından asılı olmayaraq, rəsmi şəkildə “Ermənistan lideri tərəfindən Ermənistan adından” imzalanması beynəlxalq tanınmanın zəruriliyi baxımından vacib bir dəqiqləşmədir.
Analitik baxımdan, Ağ Evdə paraflanmış Sülh sazişi iki əsas məqamı ortaya qoyur. Bunlardan birinci Azərbaycan və Ermənistan tərəfindən bir-birinin ərazi bütövlüyünün tanınması və gələcək planların beynəlxalq hüquqa söykənməsidir. Başqa sözlə, hər iki tərəf bir-birinin ərazi bütövlüyünü tanıyır və bundan sonrakı əlaqələrini beynəlxalq hüququn bu fundamental prinsipləri əsasında formalaşdıracaq. Digər vacib müddəa Minsk Qrupunun ləğvi ilə bağlıdır. Bu, danışıqların ilkin mərhələlərində Azərbaycan tərəfindən irəli sürülən şərtlərdən biri idi və Vaşinqton razılaşmasında bu istiqamətdə konkret nəticələr əldə olunub.”
Bu fikirləri aia.az-a verdiyi açıqlamasında millət vəkili Göydəniz Qəhrəmanov səsləndirib.
Fikirlərini davam etdirən deputat imzalanmış sənədlərdə Zəngəzur dəhlizi (TRİPP) ilə bağlı müddəaların yer almasını əhəmiyyətli məqam kimi xüsusi vurğulayıb: “Məlum olduğu kimi, Zəngəzur dəhlizi (TRIPP) yalnız nəqliyyat layihəsi deyil, eyni zamanda regional inteqrasiyanın göstəricisidir. Cənab Prezident İlham Əliyevin dediyi kimi, TRIPP marşrutunun açılması yalnız Azərbaycan üçün yox, eyni zamanda ən yeni nəqliyyat imkanları yaradacaq, ticarət marşrutlarını genişləndirəcək bir layihə kimi bütün Avrasiya məkanı üçün vacib və əhəmiyyətli bir nailiyyət kimi dəyərləndirilir. Beləliklə, Zəngəzur (TRİPP) dəhlizinin açılması Cənubi Qafqazda barışıq və inteqrasiyanın çox real, struktur komponentidir. Lakin bütün bunlarla yanaşı, yalnız Ermənistan konstitusiyasında Azərbaycanın ərazi bütövlüyünə qarşı olan müddəa aradan qaldırıldıqdan sonra sülh sazişi imzalanacaq.”
Daha sonra Göydəniz Qəhrəmanov Azərbaycan-İran əlaqələrinin mövcud durumuna dair ölkə Prezidentinin müsahibəsində yer almış açıqlamalara münasibət bildirib: “Digər məsələlərlə yanaşı cənab Prezident İlham Əliyevin Əl-Ərəbiyyə televiziya kanalına verdiyi müsahibəsində Azərbaycan–İran münasibətlərinə də kifayət qədər diqqət yetirilib. Dövlətimizin başçısı İran Prezidenti ilə “eyni dili danışdıqları”nı vurğulayaraq, aralarında anlaşılan və səmimi əlaqələr olduğunu qeyd edib. Tehran ilə Bakı arasında rəsmi yollarla inkişaf etdirilən konstruktiv əlaqələri, dövlət səviyyəsində və prezidentlər arasında yüksək etimadı göstərir.
Xüsusi olaraq Zəngəzur dəhlizinin (TRIPP) İran üçün təhlükə daşımadığı vurğulanıb. Cənab Prezident İlham Əliyev bu dəhlizin həm şərq–qərb, həm də şimal–cənub istiqamətini tamamlayacaq mühüm nəqliyyat arteriyası olduğunu qeyd edərək bildirib ki, bu layihənin icrası Rusiyadan Azərbaycana, İrana gedən Şimal-Cənub marşrutundan əlavə, bizim digər marşrutumuz da olacaq - Rusiyadan Azərbaycana, Ermənistana, Naxçıvana, İrana və onunla Fars körfəzinə çıxmaq olacaq– beləliklə bütün region üçün hamının udacağı vəziyyət yaranacaq və heç kim bundan itirməyəcək deyə, millət vəkili fikirlərini başa çatdırıb.
