Ramazanın sonuncu günü fitrə zəkatı vermək olarmı? - AÇIQLAMA

İslama görə Ramazan ayının bitməsi Fitr bayramı ilə qeyd olunur. Bu il aprelin 10-da Azərbaycanda Ramazan bayramının namazı qılınacaq.

Bununla bağlı Sfera.az-a açıqlama verən ilahiyyat üzrə fəlsəfə doktoru Ceyhun Məmmədov deyib ki, Ramazana xas əməllərdən biri də fitrə zəkatıdır və dinimizə görə hər bir müsəlman fitrə zəkatını verməlidir:

“Məbləğə gəldikdə isə imkandan asılı olaraq bu məbləğ 3-15 AZN arası dəyişə bilər. Bu, bilavasitə fitrə zəkatı verilən ərzaqın dəyərindən asılıdır. Əgər siz fitrə zəkatını buğdanın qiyməti ilə hesablasanız, məbləğ daha aşağı, xurma və ya düyü ilə hesablasanız, daha baha olacaq. Çünki hər üç ərzaq növü arasında qiymət fərqi var. Fitrə zəkatı ərzaqla verilməlidir yoxsa ərzağın dəyərində pul da verilə bilər məsələsinə gəldikdə isə, bəzi islam alimləri fitrə zəkatının mütləq ərzaqla verilməsinin vacibliyini vurğulayırlar. Müasir dövrün ehtiyaclarını nəzərə alaraq bir sıra islam alimləri ərzaq dəyərində pulun verilməsinin mümkünlüyünü bildirirlər”.

C.Məmmədov bildirib ki, günümüzün reallıqları nəzər alınaraq fitrə zəkatı pulla da verilə bilər:

“Fitrə zəkatı verilən insan nəyə daha çox ehtiyacının olduğunu bildiyi üçün həmin pulla özü istədiyi ərzağı və ya başqa ehtiyacı olan əşyanı ala bilər. İmkanı olan hər bir şəxsin fitrə zəkatını verməsi vacibdir. Fitrə zəkatı mütləq imkansız insanlara verilməlidir. Fitrə zəkatının vaxtına gəldikdə Ramazanın sonuncu gününə, ən geci bayram namazına kimi fitrə zəkatı verilməlidir”.

Günay