Ezamiyyə xərcləri artırıldı - Deputatdan AÇIQLAMA

Nazirlər Kabineti ezamiyyə xərclərinin dəyişdirilməsi barədə qərar qəbul edib. Artıq yeni, artırılmış normalar qüvvəyə minib.

Sfera.az xəbər verir ki, bu barədə fikirləri Milli Məclisin deputatı Vüqar Bayramov bildirib.

“Qərara əsasən, ezamiyyə norması Bakı şəhərində 125 manat (əvvəl 90 manat), Gəncə, Sumqayıt şəhərlərində 95 manat (əvvəl 70 manat), respublika tabeli digər şəhərlərdə, rayon mərkəzlərində, şəhər tipli qəsəbələrdə və kəndlərdə 90 manat (əvvəl 65 manat), Naxçıvan şəhərində isə 100 manat (əvvəl 70 manat) müəyyənləşib. Xarici səfərlər zamanı dollarla ən yüksək Nyu York şəhərində (450 dollar), avro ekvivalentində isə İsveçrənin Bern, Cenevrə və Sürix şəhərlərində (330 avro) ödəniləcək. 5 ildən çox müddət idi ki, Azərbaycanda ezamiyyə xərc normaları dəyişdirilmirdi. Bu müddətdə həm ölkə daxilində, həm də xaricdə, xüsusən də 2022 və 2023-cü illərdə yüksək inflyasiya qeydə alınıb. Bu baxımdan, belə bir qərarın qəbuluna ehtiyac var idi”.

Deputat qeyd edib ki, ezamiyyə normalarının illik inflyasiya göstəricisinə indeksləşdirilərək artırılması daha məqsədəuyğun olardı.

“Bu normaların reallığının qorunub saxlanmasına imkan yaratmaqla ezamiyyə gedən vətəndaşlar üçün əlavə xərcləmələrin yaranmasnın qarşısını almaq olar”.

Ülkər Abdurahmanlı