Sumqayıtda təkəri yerində olmayan qəzalı yük avtomobilinin nəqliyyatın intensiv hərəkət etdiyi yolda yedəyə alınaraq təhlükəli üsulla daşınması ilə bağlı sosial mediada videogörüntülər yayılıb.

Baş Dövlət Yol Polisi (DYP) İdarəsindən Sfera.az-a verilən məlumata görə, yayılan videogörüntü araşdırılıb.

Belə ki, nasaz avtomobillə yol örtüyünü yararsız hala salmaqla yanaşı, digər hərəkət iştirakçılarına ciddi təhlükə yaradan, eləcə də nasaz avtomobili yedəyə alaraq təhlükəli üsulla daşıyan sürücülər müəyyən olunub. Qurumdan bildirilib ki, sözügedən şəxslər barədə qanunvericiliyə uyğun tədbir görülüb.

“Üzləşdiyi problemi başqalarına təhlükə yaratmaqla aradan qaldırmağa çalışan “ZİL” sürücüsünün bir daha bu kimi əməllər törətməyəcəyinə dair verdiyi vədə əməl edəcəyinə ümid edir və ictimai qınağa səbəb olan belə halların digər sürücülər tərəfindən təkrarlanmayacağına inanırıq”, - məlumatda qeyd edilib.

Günay