Boşanmalar daha çox bu səbəblərdən YARANIR - Psixoloqdan AÇIQLAMA
Boşanma hallarının yaranma səbəbləri müxtəlifdir. Ailədaxili münaqişlərin artmasının və boşanma ilə nəticələnməsinin bir sıra psixoloji səbəbləri var.
Bəs həmin psixoloji səbəblər hansılardır?
Mövzu ilə bağlı Sfera.az-a danışan psixoloq Ləman Məmmədova bildirib ki, münasibətin başlanğıcında verilən vədlərin tutulmaması da boşanmaya səbəb olan hallardan biridir.
“Bəzən sevgililikdən əvvəlki və ya sevgililik mərhələsində partnyoru əldə etmək, onu manipulyasiya etmək üçün müxtəlif yalan vədlər verilir. Bu zaman qarşı tərəfin gözləntiləri yüksəlir, lakin sonra partnyorunu əldə etmiş şəxs üçün qarşı tərəf maraqsızlaşa bilir, artıq onun üçün vəzifə tamamlanmış hesab olunur. O verdiyi vədləri tutmur və münasibət üçün artıq heç bir şey etməməyə başlayır. Bu da qarşı tərəfin etirazına səbəb olur”.
Psixoloq qeyd edib ki, digər ən vacib nüanslardan biri isə partnyorlardan birinin ailənin yükünü qaldıra bilməməsi və ya məsuliyyətdən qaçması zamanı ortaya çıxır.
“Bu hallarda kişi maddi cəhətdən ailəni təmin etmək üçün çalışmır. Övladlarının və ya yoldaşının qayğısına qalmır. Öz məsuliyyətini sadəcə partnyorunun üzərinə atır. Boşanmaların situativ səbəbləri ilə yanaşı, etnopsixoloji səbəbləri də mövcuddur. Yoldaşına daima şübhə ilə yanaşmaq konfliktlərin yaranmasına səbəb olur. Bütün günü hardasan, görüntülü yığ, məkanı göndər, arxadan səs gəldi, instagram parolu ver, kodu de və s. tipli tələblər edən insanlar münasibətdə həm qarşı tərəfi, həm də özlərini yorurlar".
Psixoloqun sözlərinə görə, ailəyə xarici təzyiqlərin olması da cəmiyyətdə ən başlıca boşanma səbəblərindən hesab olunur:
“Ailələrdə analar öv övladlarının fikir azadlığını qəbul etmir və ailə qurduqdan sonra da ailələrə müdaxilə edirlər. Analar qızlarından ailədə olan hər şeyi onlara danışmasını, oğullarından isə sadəcə onların dediklərini etməsini gözləyirlər. Lakin bu düzgün yanaşma deyil. Bu müdaxilələr nəticəsində cütlüklər arasında problemlər yaranır və nəticəsi yaxşı olmur”.
Ülkər Abdurahmanlı
