"Rusiya təhlükəsizlik sahəsində ABŞ-nin arxasınca qaçmayacaq" - Səfir
"Əgər Vaşinqton təhlükəsizlik sahəsində əməkdaşlıq etmək istəməsə, Rusiya ABŞ-nin arxasınca qaçmayacaq".
Sfera.az xarici KİV-ə istinadən xəbər verir ki, bunu Rusiyanın ABŞ-dəki səfiri Anatoli Antonov jurnalistlərə açıqlamasında bildirib.
Belə ki, Moskva yaxınlığındakı musiqi salonunda törədilən terror aktından sonra Ağ Evin Milli Təhlükəsizlik Şurasının Strateji Kommunikasiyalar üzrə koordinatoru Con Kirbi bildirib ki, Rusiya və ABŞ arasında heç bir təhlükəsizlik yardımı olmayacaq və bu, ABŞ-nin seçimidir.
Bunun ardınca Antonov terror probleminin birgə səylərlə həllinin vacibliyini vurğulayıb:
"İndiki vəziyyətdə biz dost ölkələrimizlə - Müstəqil Dövlətlər Birliyindən, eləcə də Şanxay Əməkdaşlıq Təşkilatından və BRİKS-dən olan dostlarımızla işləyəcəyik.
Təəssüf ki, bizimlə antiterror əməkdaşlığı dayandıran ABŞ oldu. Onların arxasınca qaçmırıq və bunu etmək planımız yoxdur. Biz terrorizmin köklərini məhv etmək üçün öz gücümüzlə çalışacağıq, çünki təəssüf ki, hələ də bəziləri Rusiyadadır”.
Qeyd edək ki, martın 22-də Rusiyada yerləşən "Crocus City Hall" restoranında terror aktı törədilib. Rusiya İstintaq Komitəsinin məlumatına görə, hazırda ölənlərin sayı 137-dir, lakin arta bilər. Moskva vilayətinin Səhiyyə Nazirliyinin məlumatına görə, 182 nəfər xəsarət alıb. Terror aktında əli olmaqda şübhəli bilinən 11 nəfər, o cümlədən Moskvanın cənub-qərbindəki Ukrayna sərhədini keçərək sığınacaq axtarmağa cəhd edən 4 silahlı şəxs saxlanılıb.
Prezident Vladimir Putin çıxışında deyib ki, ilkin məlumata görə, Ukrayna tərəfi sərhəddə terrorçuların aşkar edilmədən keçməsi üçün “pəncərə” hazırlayıb. O, "Crocus City Hall"a hücumun arxasında duran bütün şəxslərin müəyyən edilərək cəzalandırılacağına söz verib və martın 24-nü həlak olanlar üçün milli matəm günü elan edib.
Firuzə Əliyeva
