Putindən seçkilərlə bağlı Qərbə XƏBƏRDARLIQ: "Düşmənçilik kimi qiymətləndirəcəyik"
Rusiya Xarici Kəşfiyyat Xidməti (SVR) ABŞ-ni Rusiyada bu həftəsonu keçiriləcək prezident seçkilərinə müdaxilə etmək cəhdində ittiham edib və Vaşinqtonun elektron səsvermə sisteminə kiberhücumlar təşkil etməyi planlaşdırdığını bildirib.
Sfera.az xarixi KİV-ə istinadən xəbər verir ki, Rusiyada martın 15-17-də keçirilməsi planlaşdırılan seçkilərdə qalib gələcəyi gözlənilən Rusiya prezidenti Vladimir Putin xarici güclərin seçkilərə müdaxilə cəhdlərinin “düşmənçilik aktı” kimi qiymətləndiriləcəyi ilə bağlı Qərbə xəbərdarlıq edib.
SVR tərəfindən verilən açıqlamada bildirilib ki, onlar ABŞ Prezidenti Co Bayden administrasiyasının seçkilərə müdaxilə etmək niyyətində olduğuna dair məlumatlara sahibdirlər.
Bəyanatda aşağıdakı ifadələr də yer alıb:
“SVR-in əldə etdiyi məlumata görə, Co Bayden administrasiyası ABŞ-nin qeyri-hökumət təşkilatlarına seçkilərdə iştirak nisbətini azaltmağı tapşıracaq. ABŞ-nin aparıcı İT mütəxəssislərinin iştirakı ilə elektron səsvermə sisteminə kiberhücumların həyata keçirilməsi planlaşdırılır. Bu, rusiyalıların əhəmiyyətli bir hissəsinin səslərinin hesablanmasını qeyri-mümkün edəcək”.
Lakin SVR buna dair heç bir sübut təqdim etməyib. ABŞ isə hələlik ittihamlara cavab verməyib.
Əzizə Zeynal
