Paşinyanın İranla bağlı MƏKRLİ PLANLARI: “Tehran başa düşəcək ki..”

“Ermənistan İrana qarşı Qərbin hərbi-kəşfiyyat mərkəzi rolunu icra edəcək”.

Bunu Sfera.az-a açıqlamasında politoloq Məhəmməd Əsədullazadə deyib. Onun sözlərinə görə, İrəvanın Qərb ölkələri ilə əməkdaşlığını inkişaf etdirməsi, paralel olaraq bu ölkədə kəşfiyyat orqanlarının fəaliyyətinin genişləndirilməsinə gətirib çıxarır. Ekspert bildirib ki, ABŞ, Fransa və digər ölkələrin hərbi və kəşfiyyat təlimatçıları Ermənistanda yerləşdiriləcək və onların əsas hədəfi Rusiya, o cümlədən İrandır:

“Ermənistan onlar üçün bu şəraiti yaradaraq öz siyasətini Vaşinqton və Parisə təslim edir. Rusiya və İran eyni platformada yer alırlar və hər iki ölkənin zəiflədilməsi Qərbin strateji planında var. Bu baxımdan Qərb İrana qarşı Ermənistan ərazisindən öz fəaliyyət imkanlarını genişləndirmək üçün istifadə edəcək. Bundan sonra İran tam nəzarət altında olacaq. Demək olar ki, Ermənistan İrana qarşı Qərbin əsas kəşfiyyat mərkəzi kimi fəaliyyət göstərəcək”.

M.Əsədullazadənin sözlərinə görə, Paşinyan hakimiyyəti İran rəsmilərini inandırmağa çalışır ki, Ermənistanda öz imkanlarını səfərbər edən Qərbin fəaliyyəti onlara deyil, Türkiyə və Azərbaycana qarşıdır:

“Tehran Ermənistandan İrana səfər edən yüksək çinli rəsmilərə xəbərdarlıq etməklə kifayətlənir. Zaman isə İranın əleyhinə işləyir. Bir müddətdən sonra Tehranda Ermənistanın necə təhlükəli olduğunun fərqində olacaqlar. İran başa düşəcək ki, Zəngəzur dəhlizinin açılması məhz onun təhlükəsizlik imkanlarına da cavab verir”.

Günay