Fransa Prezidenti Emmanuel Makron Rusiyanın təhdidlərinə cavab verib.

Sfera.az bildirir ki, bu yaxınlarda Ukraynaya qoşun yeritmək ideyasını müzakirə edən və fərqli reaksiyalarla qarşılaşan Makron bu dəfə Çexiyanın paytaxtı Praqadan səslənib. O, qorxmaq lazım olmadığını deyib.

“Biz tarixə və onun tələb etdiyi cəsarətə uyğun hərəkət etməliyik. Qorxaq olmağın zamanı deyil”, - Makron bildirib.

Fransa lideri həmçinin, Ukraynaya qoşun göndərməklə bağlı fikirlərinin arxasında dayandığını vurğulayıb. Almaniyanın müdafiə naziri Boris Pistorius Makronun bu çıxışına dərhal reaksiya verib:

“Ən azından mənim nöqteyi-nəzərimdən, qoşunların cəbhəyə göndərilməsi və ya az-çox cəsarətlə bağlı müzakirələrə ehtiyacımız yoxdur. Bu, Ukraynaya bacardığımız qədər dəstək verməklə bağlı problemlərimizi həll etməyə kömək etmir. Söhbət kimin daha çox kömək edə biləcəyindən, kimin daha cəsarətli olmasından getmir. Mövzu daha çətin məsələlərlə bağlıdır. Bu isə, artilleriya sursatlarının və ya hava hücumundan müdafiə sisteminin istehsalı kimi sənaye imkanlarını effektiv və sürətlə genişləndirməkdən ibarətdir. Biz bunlara fokuslanmalıyıq”.

Qeyd edək ki, Makronun fevralın 26-da verdiyi bəyanatdan sonra əksər Avropa ölkələri Ukraynaya qoşun göndərmək fikrində maraqlı olmadıqlarını bildirdilər. Fransa rəsmiləri, göndəriləcək əsgərlərin mina təmizləmə kimi işlərdə iştirak edə biləcəyi qənaətindədirlər.

Günay