Dünyanın belə gərgin məqamında münasibətlərin müharibələr yolu ilə deyil, diplomatik danışıqlar vasitəsilə həll edilməsi çox zəruridir. Məhz münasibətlərin bu qədər gərginləşdiyi dövrdə III Antalya Diplomatiya Forumu keçirilib. Türkiyənin ev sahibliyi ilə təşkil olunan foruma 148 ölkədən 4700 nəfər qatılıb.

Sfera.az xəbər verir ki, bu barədə fikirləri Sosial Rifah və Tədqiqatlar İctimai Birliyinin sədri Əkrəm Baydəmirli bildirib.

“Tədbirin miqyasına, aparılan müzakirələrin zəruriliyinə nəzər salanda dünyanın hansı təlatümlərlə üzləşdiyini aydın görürük. Müxtəlif ölkələrdən olan iştirakçılar dərinləşən gərginliklərin, davam edən münaqişələrin yaratdığı fəlakətlərin fərqindədirlər".

Ə. Baydəmirli qeyd edib ki, hazırkı məqamda Azərbaycanın və Türkiyənin ortaya qoyduğu iqtisadi əməkdaşlıq mexanizmi regiona sabitlik, inkişaf gətirə bilər.

“Diplomatiyanın da mahiyyətində sabitliyə, iqtisadi inkişafa nail olmaq dayanır. Bu gün Fransa və digər dövlətlər tərəfindən Ermənistanın silahlandırılması regionda və dünyada sabitliyi əlçatmaz edir. Yeni münaqişə ocağının yaranmasına rəvac verir. Demokratiyadan yekə-yekə danışan Qərb silahlanmanın ağır nəticələrini düşünməlidir. III Antalya Forumunda bu və digər məqamlarla bağlı, dünyanı təqib edən təhlükələrdən xilas yolunun tapılması üçün müzakirələr aparılıb. Müxtəlif ölkələrdən foruma qatılan qonaqların çıxışı sabitlik, sülhə çağırış, iqtisadi inkişaf istiqamətləri, əməkdaşlıq və s. mövzuları əhatə edib. Güman etmək olar ki, belə mötəbər toplantıların effekti olacaq. Siyasi dairələr reallığı dərk edib nəticə çıxaracaqlar”.

Ülkər Abdurahmanlı