"Bu şəxslər inzibati məsuliyyətə cəlb oluna bilər" – AÇIQLAMA
Xeyli müddətdir ki, bəzi məktəblərdə şagirdlərə qarşı bullinq hallarının artmasının şahidi oluruq. Bullinq məktəblilərə və şagirdlərə qarşı aqressiv davranışdır.
Bəs bullinq qanunvericilikdə necə tənzimlənir?
Mövzu ilə bağlı Sfera.az-a danışan vəkil Sevinc Əliyeva bildirib ki, zorakılığın bu növü qanunvericilikdə ayrıca tənzimlənmir.
"Təhsil haqında qanunda qeyd olunub ki, şagirdləri istənilən fiziki, psixoloji zorakılıqdan qorumaq təhsilverənin borcudur. Bu şagirdlərin bullinqdən qorunması ilə bağlı maddədir. Bullinq yalnız şagirdlər tərəfindən deyil, müəllimlər və valideynlər tərəfindən də edilir. Lakin onlar arasında ən həssası şagirdlər tərəfindən ediləndir. Onun xüsusi cəhətlərindən biri də tez-tez təkrarlanmasıdır. Amma təəssüflər olsun ki, nə təhsil haqqında qanunda, nə də nümunəvi nizamnamədə icra mexanizmi göstərilməyib. Bununla bağlı sadəcə bir sıra məktəblərin özlərinin təyin etdiyi qaydalar mövcuddur”.
Vəkil qeyd edib ki, bullinqə məruz qalan uşaq bununla bağlı birinci məktəbin rəhbərliyinə bildirməlidir.
“Bullinq edən şəxslər Cinayət Məcəlləsinin 221-ci maddəsi üzrə, yəni xuliqanlığa, ictimai qaydanı kobud surətdə pozduqlarına, cəmiyyətə açıq-aşkar hörmətsizlik göstərdiklərinə, şəxslərə qarşı zor tətbiq etdiklərinə görə məsuliyyətə cəlb oluna bilərlər. Bu halların qarşısını almaq üçün şagirdlər və valideynlərlə profilaktik söhbətlər aparılmalıdır”.
Ülkər Abdurahmanlı
